Zainab Bint Jahsh

Zainab Bint Jahsh

Sekaniyan so thenged o Nabi (Sallallaho ‘Alaihi Wasallam). Aya minimbanaya iyan na so kokowaan o Nabi (Sallallaho ‘Alaihi Wasallam) a wata iyan a so Zaid Bin Haritha (Radiallaho ‘Anho). So kiyatalaka-on o Zaid na miyangaroma sekaniyan o Nabi (Sallallaho ‘Alaihi Wasallam) a sogo-an o Allah, sa lagid o kiya-aloy niyan sa Surah Al-Ahzab. Miyanggola-ola ini ko ika lima ragon ko Hijrah; sangkoto a masa na telo-polo ago lima ragon a omor iyan. Giyoto-I sabap a inimbawata sekaniyan ko sapolo-ago pito ragon ko da pen so Nabuwwat. Tanto niyan a ipephangandag a so kalangowan a manga karoma o Nabi (Sallallaho ‘Alaihi Wasallam) na ini-idin rekaniyan o manga lokes iran, na sekaniyan na soden so Allah na aya-on migay a karoma o Nabi (Sallallaho ‘Alaihi Wasallam). So kiyatalaka-on o Zaid go oriyan o kiyatarotop o Iddat, na piyangakapan sekaniyan o Nabi (Sallallaho ‘Alaihi Wasallam). Miya-aloy niyan:

”Da den a mapetharo aken taman sa di ako maka-odas ko Allah.”

Miyadabedas sekaniyan na mizambayang sa dowa ka raka’ah na miyangeni ko Allah:

“Ya Allah! So Nabi Ngka na piyangakapan ako niyan. O domada-it raken angkanan a bantogan, na began ako Ngka-on a karoma niyan.”

So Allah na tiyarima Iyan so pangeni niyan mokit sa kinotoronen Niyan sangka-iya a Ayaat ko Nabi (Sallallaho ‘Alaihi Wasallam):

  فَلَمَّا قَضَى زَيْدٌ مِّنْهَا وَطَراً زَوَّجْنَاكَهَا لِكَيْ لَا يَكُونَ عَلَى الْمُؤْمِنِينَ حَرَجٌ فِي أَزْوَاجِ أَدْعِيَائِهِمْ إِذَا قَضَوْا مِنْهُنَّ وَطَراً وَكَانَ أَمْرُ اللَّهِ مَفْعُولاً

“Na kagiya a minggolalan on i zayd so hadiyat, na piyakipangaroma Mi rka skaniyan: ka an daa khabaloy ko miyamaratiyaya a dosa sii ko manga karoma o piyamangowa iran a manga wata iran, igira a mininggolalan iran kiran so hadiyat. Na tatap a so sogoan o Allah na mapnggolawla.” [Ahzab:37]

Soden so kiyanega niyan sangkoto a mapiya a manga tothol pantag sangkanan a initoron, na somiyodod sekaniyan ko Allah sa panalamat. So Nabi (Sallallaho ‘Alaihi Wasallam) na mikhandori sa mala a Walimah sangkoto a kiyapaka-pangaroma. Siyombali so kambing na so sapo iyan na pizawawan go rakhes a aden a rot iron na inipagana ko manga tao. So manga tao na mizagorompong siran mak-oma, na pephakaken siran taman sa langon siran miyakakan.

So Zainab (r.a.) na tanto a maginawa sa kapamemegay sa lalan ko Allah. Pephakasokat a nggolalan ko galebek o mbala a lima niyan na langon niyan noto gi-I pamemegay a sadqah. Makapantag rekaniyan a miyan-antok o Nabi (Sallallaho ‘Alaihi Wasallam):

“So karoma ko a marawa-I barokan na aya raken paganay a khitapi ko oriyan o kawapat aken.”

So manga karoma niyan na aya kiyasabot iran sii na so karawa o baroka niran sa giyoto-o kiyapanakesa iran non a lilit. So lima o Sauda (r.a.) na aya kiran matas-I takes. Ogaid na so kiyawapat o Zainab (r.a.) na so ma-ana angkanan a katharo o Nabi (Sallallaho ‘Alaihi Wasallam) na kkiyatokawan niran. Kalilid a gi-I niyan kapamowasa. Miyawapat sekaniyan ko ragon a ika dowa-polo ko Hijrah na so den so ‘Umar (r.a.) na aya miyagolowan ko kinikoboren non. Lima polo a omor iyan sangkoto a masa a kiyawapat iyan.