So Kiyarasay o Abu Bakr (Radiallaho 'Anho) Ko Islam

“SO KIYARASAY O ABU BAKR (RADIALLAHU ANHU) KO ISLAM”

Sii ko pagany, na so langon a somiyoled ko Islam na matatago iran so paratiyaya iran sa pagenes, ko taman a khagaga iran non. Sabap ko kaphrerasta-a o manga Quraish lalayon ko mga Muslim, na apiya so Nabi (Sallallaho ‘Alaihi Wasallam) na kiyapando-an niyan so langowan o bago a Muslim sa kinggolalanen niran ko Islam sa pagenes, ka kalo-kalo na di siran makagedam sa masakit pho-on ko manga Quraish. So den so kinisampay o manga Muslim na telo-polo ago siyaw, na so Abu Bakr (r.a.) na inimosawir iyan a pakarayagen niran so gi-I ran kipanolonen ago kinggolalanen ko Islam. So Nabi (Sallallaho ‘Alaihi Wasallam) na do-o maka-ayon, ogaid na sabap ko kininitegelen non o Abu Bakr (r.a.) na miyaka-iyog so Nabi (Sallallaho ‘Alaihi Wasallam) so langon siran somiyong sa Haram a phanolon siran. So Abu Bakr (r.a.) na aya miyona tharo na so Khutba a inibegay niyan na aya pagampaganay a minipangotba ko totholan ko Islam.

So Hamza (r.a.) a bapa o Nabi (Sallallaho ‘Alaihi Wasallam) ago olowan o manga Shohada na somiyoled ko Islam sangkoto den a gawi-I, na so ‘Umar (r.a.) na somiyoled ko Islam ko ika telo gawi-I ko oriyan angkoto a Khutbah. So den so kiyapho-on o Abu Bakr (r.a.) na so manga pananakoto ago so manga miyamangongkir ko manga Quraish na siyagombang iran so manga Muslim. Minsan pen aya mata-an na kikilala-an sekaniyan a isa ko manga bara-bangensaan ago paga-adatan ko manga dato sa Makkah, na so Abu Bakr (r.a.) na miyaperaneg taman sa piyamangokitan a rogo so ngirong iyan, go so manga tangila niyan so minipanagop iyan pen. Pizipa sekaniyan ago pilelebad a talompa taros pindapo-an sekaniyan a manga a-I ago tanto sekaniyan a tiyarakoso. Kiyada-an sekaniyan sa tanod na babo da matay; na daden a ba tomiyangked sa ba sekaniyan makapagoyag sangkoto a kiyapakasakiti ron. So Banu Te’em, a manga bangensa niyan, na miyaka-oma siran na inawidan niran sa walay niyan.

Piyakalangkap iran pen sa Haram a o aden a manggola-ola o Abu Bakr (r.a.) sangkoto a kiyasakiti ron na ikhitas iran non so Utbah-bin-Rabiah, a aya mala a minggolima. So Abu Bakr (r.a.) na daden a tanod iyan sangkoto a miyababasa alongan. So lomilibeton a manga tao na makapira iran den katalowi so ingaran niyan a pethokaon niran o miyakatanod, ogaid na di sekaniyan den makapetharo. Ogaid na si-I ko kinibolog iyan a gawi-I na miyabekar iyan a mata niyan na miyakathiniyas sa miyakatanod sekaniyan. So den so kiyapakatharo iyan, na mini-iza iyan:

“Antona-ai miyanggola-ola o Nabi (Sallallaho ‘Alaihi Wasallam)?”

So manga tao a lomilibeton na miyagowad siran baden na miyatharo iran:

“Antonaa ini a minsan pen kiyasagadan niyan angkaya a tiyoba ko si-I ko oriyan o kiyatago iyan ko ngari o kapatay sa miyababasa alongan sabap bo ko Nabi (Sallallaho ‘Alaihi Wasallam) na soden na-I so kiyapakatanod iyan, na daden a mini-iza iyan inonta so Nabi.”

Inawa-an niran so Abu Bakr (r.a.) a tanto siran a miyagowad ko babaya iyan ko Nabi (Sallallaho ‘Alaihi Wasallam), go rakhes a miyababaya siran ko kiyada iyan ko maregen. Piyando-an niran so Umme Khair, a ina iyan, sa kowa-an niyan sa makan niyan. Ogaid na da niyan den mazagipa so pangenengken niyan, ka so Abu Bakr (r.a.) na lalayon ago ka-angetan den sa kiphagiza-an niyan ko ina iyan sa sasatiman a paka-iza:

“Antona-ai miyanggola-ola o Nabi (Sallallaho ‘Alaihi Wasallam)?”

So kiyasipata niyan non sa di mikaka-ip o ina iyan so miyanggola-ola o Nabi (Sallallaho ‘Alaihi Wasallam) na piyangeni niyan ko ina iyan a somong ko Umme Jamil (a babay o ‘Umar) na i-iza iyan non so mori a totholan ko Nabi (Sallallaho ‘Alaihi Wasallam). So ina iyan na da niyan marao so pangni o wata iyan si-I sangkoto a piyakarata-rata sa ginawa a miyambetad, na minggaga-an somong ko walay o Umme Jamil kaipagiza iyan non o antona-I mambebetad o Nabi (Sallallaho ‘Alaihi Wasallam). Lagid den o manga ped a Muslim sangkoto a masa, na so Umme Jamil na pagemaan niyan so paratiyaya niyan. Piyagma iyan so katawi niyan ko Nabi (Sallallaho ‘Alaihi Wasallam), a gi-I niyan tharoon:

“Antawa-a so Muhammad go antawa-a so Abu Bakr? Ino aken siran miya-awid a akal? Ogaid na miyarata a ginawa ko si-I ko miyambetad o wata-a ka; o kabaya-a ka na monot ako reka na an-aken sekaniyan mailay.”

Miyayon ro-o so Umme Khair na dowa siran a somiyong ko Abu Bakr (r.a.). So den so kiya-ilaya niyan ko Abu Bakr (r.a.) sangkoto a mambebetad iyan na da niyan mipa-ar a ginawa niyan na miyakagora-ok, sa gi-niyan matharo:

“Do-an do-an niyan angkanan a manga rarata-I ongar a manga tao ko pinggola-ola iran ko sakatao a lagid o Abu Bakr. Siksa-an siran o Allah ko karata irani adat.”

Da niyan den zagipa-a so miyatharo o Umme Khair, na so Abu Bakr (r.a.) na lagid peman noto a minibenga sa modol iyan, ma-ana:

“Antona-ai miyambetad o Nabi (Sallallaho ‘Alaihi Wasallam)?”

So Umme Jamil (a initoro iyan so Umme Khair)

“Di makabinasa o aden a matharo si-I sa kapakadadarepa iyan?”

So Abu Bakr: ”Di ngka sekaniyan pekhawanen! Tharo-angka raken sa maga-an o antonai miyambetad o Nabi (Sallallaho ‘Alaihi Wasallam)?”

So Umme Jamil: “Mapipiya ginawa niyan.”

So Abu Bakr: “Anda sekaniyan imanto kapapantagi?”

So Umme Jamil: “Sa Dar-ul Arqam.”

So Abu Bakr: “Ibet ko Allah! Ka di ako den koman taman sa di aken sekaniyan ma-ilay.”

So ina iyan na tanto niyan a mi-awid a akal a kapakakana niyanon. Katawan niyan a pabila mizamaya iyan na di niyan den mbaro-baan so samaya iyan sa, giyoto-I sabap a di sekaniyan den koman apiya antona-ai miyanggola-ola. Miyaka-ayon sekaniyan sa witen niyan sekaniyan sa Arqam. Miyanayao niyan da-an a thidelag so manga tao sa liyo na go niyan bo mawit sekaniyan ko darpa a da sekaniyan kata-odi o manga Quraish. Kagiya misampay siran a dowa sa Dar-ul-Arqam, na miya-ilay o Abu Bakr (r.a.) so Nabi (Sallallaho ‘Alaihi Wasallam) na miyagakes iyan na gomiyora-ok sa tanto a mala. Miyakagora-ok mambo so Nabi (Sallallaho ‘Alaihi Wasallam) na so langon a Muslim a makamasa na langon miyaka-otantang gomora-ok sangkoto a ma-oola-ola o Abu Bakr (r.a.).

So Abu Bakr (r.a.) na piyaki-kilala niyan so ina iyan a Umme Khair ko Nabi (Sallallaho ‘Alaihi Wasallam), a gi-I niyan tharo-on:

“Ina aken sekaniyan. Hay Nabi o Allah! Na pamangenin ka raken sekaniyan na panamari ngka raken a kapakasoled iyan ko Islam.”

Aya paganay na inipamangeni sekaniyan o Nabi (Sallallaho ‘Alaihi Wasallam) na oriyan niyan na inidolon iyan non so Islam. Ro-o den na somiyoled sekaniyan ko Islam.

Madakel a tao a tatarima-an niran a kapekhababaya-I ran [ka pekhababaya-an niran] ko masa a mapipiya ginawa iran. Ogaid na aya titho a tanda sa kala iyan-I babaya na amay ka mapaki-ilay niyan so babaya iyan ko masa a kapakasagad sa ringasa ago maregen.