So Manga Wata a Mama o Nabi (s.a.w.)

So Manga Wata a Mama o Nabi (Sallallaho ‘Alaihi Wasallam)

So Nabi (Sallallaho ‘Alaihi Wasallam) na telo a wata iyan a manga mama ago pat katao iyan a manga babay. Langon siran na aya mimbawata kiran na so Khadijah (r.a.) inonta bo so wata iyan a mama a Ibrahim (Radiallaho 'Anho). 


1. So Qasim (Radiallaho 'Anho) na aya kaka a wata a mama, go inimbawata ko dapen so Nabuwwat. Miyawapat sekaniyan ko omor a dowa ragon. 


2. So Abdullah (Radiallaho 'Anho), a ika dowa a wata a mama, na inimbawata ko oriyan o Nabuwwat. Giyoto-i sabap a bithowan sekaniyan sa ‘Tayyab’ go ‘Tahir’. Miyawapat sekaniyan mambo. Sii ko kiyawapat iyan na tanto a miyababaya so manga Quraish na miyatharo iran:

“So Muhammad na daa wata iyan a mama, na giyoto i sabap a daa tondas iyan. So ngaran niyan na khilebeng rakhes o kaphatay niyan.”

Sabap sangkaya miyanggola-ola a kinitoronen o Allah ko Surah Al-Kauthar. Miya-aloy niyan:

إِنَّا أَعْطَيْنَاكَ الْكَوْثَرَ,  فَصَلِّ لِرَبِّكَ وَانْحَرْ,  إِنَّ شَانِئَكَ هُوَ الْأَبْتَرُ

“Mataan! a Skami na inibgay Ami rka (hay Mohammad) so madakl (a mapiya). Na zambayang ka makapantag ko Kadnan ka, go khorbang ka. Mataan! a so pkhararangit rka na skaniyan i da a tondas iyan.”   

[Al-Kawthar:1-3]

Apiya ko oriyan o sanggibo ago telo gatos ragon, imanto na phipira ka milyon a ipephangandag iran a kitotompok iran non sa babaya ago panagontaman.

3. So Ibrahim (Radiallaho 'Anho), a ika telo a wata a mama, na inimbawata sa Madinah ko ika walo ragon ko Hijrah. So darodopa iyan a Mariah (r.a.) na aya-on mimbawata. Piyaka-pagakika sekaniyan o Nabi (Sallallaho ‘Alaihi Wasallam) ko ika pito gawii ko oriyan o kinimbawata-anon. Dowa timan a bili-bili a siyombali, go inopawan so olo niyan o Abuhind Bayazi (r.a.) go so pirak a timbang o bok iyan na inibegay a sadaqah, go so bok iyan na inilebeng. So Nabi (Sallallaho ‘Alaihi Wasallam) na miyatharo iyan:

“Inisangay aken angka-iya a wata aken ko ngaran o apo aken a Ibrahim (‘Alaihis Salaam).”

Giyangka-iya a wata na miyawapat pen, ko ika sapolo ko Rabi Al-Awwal ko ika sapolo ragon ko Hijrah, ko masa a ba sekaniyan den sapolo ago walo olan a omor iyan. Miyatharo o Nabi (Sallallaho ‘Alaihi Wasallam):

“So Allah na singgayan niyan sa isa a pheritan ko Ibrahim ko manga sapadan ko Sorga.”