Maria Al-Qibtiyyah

Maria Al-Qibtiyyah

So Maria (r.a.) na inimbawata sa Egypt a aya ama iyan na Kristiyan (a lalayon di simba sa Simbahan a Copt), so ina iyan na Greek. Tomiyagalin siran Muqawqis isa ko maito pen so Maria (r.a.). Miyakaoma sekaniyan sa Madinah sii ko masa a mapangaroma sekaniyan o Nabi (Sallallaho ‘Alaihi Wasallam). Sii ko ika siyaw ragon o Hijrah, saragon a kiyawapat o wata o Nabi (Sallallaho ‘Alaihi Wasallam) a so Zainab (r.a.) na minimbawata o Maria (r.a.) so wata Ibraheem (r.a.) a iningaran iran ko Nabi Ibraheem (‘Alayhis Salaam). So kiya sapolo ago walo olan a omor iyan (Ibraheem r.a.), miyasakit sekaniyan taman sa inikawapat iyan. Apiya katawan o Nabi (Sallallaho ‘Alaihi Wasallam) a phaka-soled sa Sorga so wata iyan na da niyan maaren so kiyagora-ok iyan. Mini-iza o manga Sahabah inoto sekaniyan miyakagoraok. Aya minisumbag iyan “giyai kamamanosiyay raken”

So kiplebengen ko lawas o Ibraheem (r.a.) na giyaya mambo so masa a kiyasapengan so alongan o olan na miyakaliboteng (Eclipse). So sabaad a manga tao na tig iran bo giyaya I tanda a kiyawapat o Ibraheem (r.a.) ogaid na so Nabi (Sallallaho ‘Alaihi Wasallam) na miyatharo iyan iran a kunaba giyoto I so tanda a kiyawapat o Ibraheem (r.a.). Miyatharo iyan: “So alongan ago so olan na manga tanda o Allah, kunaba ini makapantag ko kinimbawataaon o di na kiyawapat o sakatao. O makailay kano sa datar aya na pakaala niyo so taden-tademi ko Allah sa sambayang”.

Ogaid na so manga da paratiyaya iyan (kafir) na perasta-an iran so Nabi (Sallallaho ‘Alaihi Wasallam) a da wata iyan a mama ago da tondas iyan. Miyatharo o Allah:

إِنَّا أَعْطَيْنَاكَ الْكَوْثَرَ,  فَصَلِّ لِرَبِّكَ وَانْحَرْ,  إِنَّ شَانِئَكَ هُوَ الْأَبْتَرُ

“Mataan! a Skami na inibgay Ami rka (hay Mohammad) so madakl (a mapiya). Na zambayang ka makapantag ko Kadnan ka, go khorbang ka. Mataan! a so pkhararangit rka na skaniyan i da a tondas iyan.”   

[Al-Kawthar:1-3]

مَّا كَانَ مُحَمَّدٌ أَبَا أَحَدٍ مِّن رِّجَالِكُمْ وَلَكِن رَّسُولَ اللَّهِ وَخَاتَمَ النَّبِيِّينَ وَكَانَ اللَّهُ بِكُلِّ شَيْءٍ عَلِيماً

“Da mabaloy so Mohammad a ama o isa ko manga mama rkano, na ogaid na sogo o Allah, go mori ko manga nabi: Na tatap a so Allah sii ko langowan taman na katawan Iyan.” [Ahzab:40]

So Maria (r.a) na tanto a mapiya so kiyaphiya piya ago kiyagadati ron o Nabi (Sallallaho ‘Alaihi Wasallam), pamilyan niyan ago so manga Sahabah. Tlo ragon a kapakapangeda iran taman sa kiyawapat o Nabi (Sallallaho ‘Alaihi Wasallam). Sii lima ragon a kiyawapat o Nabi (Sallallaho ‘Alaihi Wasallam) na miyawapat sekaniyan. Sii ko soled a lima ragon oto na di seka niyan pliyo inonta bo igira pembisitaan niyan so kobor o Nabi (Sallallaho ‘Alaihi Wasallam) ago so wata iyan a so Ibraheem (r.a.). So kiyawapat iyan na so den ‘Umar Ibn Al-Khattab (r.a.) I miyag-Imam ago miyagolowan ko kinikoborenon sa Al-Baqi.

Maria Al-Qibtiyyah na sekaniyan so moripori a karoma o Nabi (Sallallaho ‘Alaihi Wasallam).