Juwayriah Bint Al-Haritha

Juwayriah Bint Al-Haritha

So Juwayriah (r.a.) na wata a babay o Harith o olowan o Banu Mastaliq na aya minibanaya iyan na so Musafeh Bin Safwan.

Ped sekaniyan ko tanto a madaken a biyag a miyakowa o manga Muslim ko kiyathidawa sa Muraisee, go sii sekaniyan miinigebay ko Thabi Bin Qais (r.a.). Inibegay niyan a pasad a phakamaradika sekaniyan o mapasa niyan a ginawa niyan a telo-gatos ago nem polo a dirham. Somiyong sekaniyan ko Nabi (Sallallaho ‘Alaihi Wasallam) na miyatharo iyan:

“Hay Nabi o Allah! Wata ako a babay o Harith a olowan ko isa a lokes, go katawan ka so totholan raken. So arga a pezekaten o Thabit na tanto raken a mala. Miyaka-oma ko ka phakitabang ako reka.”

Miyayon so Nabi (Sallallaho ‘Alaihi Wasallam) a bayadan niyan so arga iyan, go piyamaradika iyan taros a pitharo iyan nin so kakhowa-a niyan non a karoma niyan. Tanto a miyababaya sangkaya pamikiran. Miyapangaroma sekaniyan o Nabi (Sallallaho ‘Alaihi Wasallam) ko ika lima ragon ko Hijrah na minisabap sangkaya a kiyakharoma-I a so manga biyag ko Banul-Mustaliq (bangsa o Juwayriah) a mararani magatos ka koman, na langon piyaka-maradika o manga Muslim. Pitharo o manga tao:

“So bangsa a kiyabantogan ko kiyapakamong iran o Nabi (Sallallaho ‘Alaihi Wasallam) na di khapakay o ba pamimisaya-ana.”

Giyanan so kapiya ini-onga o langon o kiyapamangaroma o Nabi (Sallallaho ‘Alaihi Wasallam). So Juwayriah na mata-id a so bontal iyan na tanto a phakabira-i. telo gawi-I pen ko da niyan kabiyag na pithataginep iyan so olan na lominiyo sa Madinah na miya-aben iyan. Pitharo iyan:

“So den so kiyabiyag aken, na mapanginginam aken a taginepen aken na matoman.”

Dowa polo ragon baden a omor iyan ko kiyapangaroma-aon o Nabi (Sallallaho ‘Alaihi Wasallam). Miyawapat sekaniyan ko Rabi Al-Awwal, ika lima-polo ragon ko Hijrah a aya omor iyan na nem-polo ago lima.