So Kinimbawatanon Taman ko Miyapangaroma niyan ko Khadijah

SO KINIMBAWATAAN O NABI MUHAMMAD (Sallallahu ‘Alaihi Wasallam) TAMAN KO MIYAPANGAROMAAN NIYAN KO KHADIJAH (Radiallahu Anha)

So Nabi (Sallallahu ‘Alaihi Wasallam) na inimbawata isa ko 570 CE, sii ikasapulo ago dowa o olanolan a Rabi’ul Awwal, gawi-I a isnin, sii ko ragon a bhithowan iran sa Ragon o manga Elepante sa Makkah. Aya ama iyan na si ‘Abdullah a miyawafat sii ko da pun kimbhawataan ko Nabi (Sallallahu ‘Alaihi Wasallam). Soden so kinimbawataanon na rinitan sekaniyan I Halimah As-Sa’diyah (r.a.) sii ko inged iyan ko pat ragon. Isa ko makapat ragon so Nabi (Sallallahu ‘Alaihi Wasallam) na inikasoy sekaniyan ko ina iyan a si Aminah poonan ko kiyalka-I o dowa a malaikat ko poso iyan. Sii ko edad iyan a nem na miyasakit so ina iyan na iphoon sa Madinah na kasoy siran sa Makkah. Ogaid na da mirampay sa Makkah so ina iyan ka miyawafat sa inged a Abwa.

Aya peman a miyakaritanon ko kiyawafat o ina iyan (s.a.w.) na so ama iyan a dato a si Abdul Muttalib iphoon ko idad iyan a walo. Ogaid na miyawafat so ama iyan a dato na so pakiaamaan niyan a si Abu Talib, pagari o ama iyan, na ayaon miyakaritan. Sii ko katatareg iyan ki Abu Talib na miyakasowa ndhagang taman sa sii ko idad iyan a sapolo ago dowa na somiyong sirang sa Bostra sa Syria. So Nabi (Sallallahu ‘Alaihi Wasallam) na kiyabto-an o mga tao a As-Siddiq ago Al-Amin (pkhasarigan) sii ko mapiya kipikindolona iyan ko manga tao ago sii ko kandhagang.

So Nabi (Sallallahu ‘Alaihi Wasallam) na daden a lawan iyan ko mapiya so parangay niyan so lango-an, inisarig o Khadijah so manga dhagangang iyan sa Syria. Sii ko kasasarigi iyanon na da mathi na miyakandarodopa siran a dowa. Si Khadijah na miyakadowa ma-balo (miyatay so karoma) sii da iran pen kaphakandarodopai. Miyakawing siran a aya idad o Khadijah na pat-polo ago pat na so Nabi (Sallallahu ‘Alaihi Wasallam) na dowapolo ago lima. Inimbawata o Khadijah so langon a manga wata iyan a pat a babai, siran oto si Zainab, Ruqayyah, Umm Kulthum, Fatimah, ago so dowa a mama, siran oto si Qasim ago ‘Abdullah. Si Qasim na aya miyaona a wata a mama na miyawafat sii ko idad a dowa na si ‘Abdullah na miyawafat a maito pen.