So Kiyambaloy a Nabi o Nabi Muhammad (s.a.w.)

SO KIYAMBALOY A NABI O NABI MUHAMMAD (Sallallahu ‘Alaihi Wasallam)

Sii ko idad iyan a magaan den mapat-polo na lalayon den so dikapakataroon na sii lalayon sii ko palaw a Hira’, palaw sa Makkah. Sii ko gagawi-I a ikadowa-polo ago isa sii ko bolan a Ramadhan, giyoto den so gawi-I a pat-polo a idad iyan, na siyongowan sekaniyan o Malaikah a si Jibreel (‘Alayhis Salam). “Pangadi ka” pitharo iyan ko Muhammad (s.a.w). “Di ako mataw mangadi” sumbag o Muhammad (s.a.w.). Phipharomanan o Jibreel (‘Alayhis Salam) so pitharo  iyan: “Pangadi ka: Sii ko ngaran o Kadnan ka a so Miyangadn; Inadn Iyan so manga manosiya, phoon ko manga rogo a mimbathik. Pangadi ka: Ka so Kadnan ka na lbi a Maginawa, So miyangndao ko (kisoratn ko) pansom, Inindao Niyan ko manosiya so di Niyan katawan.” So kiyapasad iyan na inawaan o Malaikah so Nabi (Sallallahu ‘Alaihi Wasallam).

So den so miya-ona-ona a minitalingoma ko Nabi (Sallallahu ‘Alaihi Wasallam) na maga-an so maga-an na miyawa roo. Di niyan den khatigr o ba pen khati sa palaw a Hira’ na miyaling sa walay niyan gaga-an. Somiyoled ko katatago-an ko Khadijah a izan o ba matanog a kapkhadega iyan sa kaginawa o rareb iyan na pitharo iyan: “Sapengi ako niyo! Sapengi ako niyo!” Siyapengan sekaniyan o Khadijah an—mada so tanto a kalek iyan. Piyanothol iyan ki Khadijah so miyasowa-sowa na miyatharo iyan pen: “Ipekhalek aken a ginawa ken” na aya miyatharo o Khadijah “Di ka khalek ka, aya mapiya na pakapiya angka a ginawang ka. Mataan ko Allah, ka di ka den bgan o Allah sa ikhabinasang ka. Mapiya so adat ka ko mga lolot ka, benar so langowan a dingka di matharo, phagogop ka sa mga tao a kareregenan, malangas ka ko mga bisita, ago phagogop ka ko manga tao a miyanga rarasay.”

Miyakalpas den so pipira a gawi-I na kimiyasoy so Nabi (Sallallahu ‘Alaihi Wasallam) sa palaw a Hira’ ka an-niyan mapasad so ped a gawi-I ko bolan a Ramadhan. Sii ko kiyapasad o Ramadhan na miyanog sekaniyan sa palaw a khasoy sa Makkah. Sii ko kapmbaba iyan, singowan sekaniyan o Jibreel (‘Alayhis Salam) a mo-ontod sa ontoda a sii makalolook ko langit ago so lopa. So miyasowa-sowa oto na minibaba so Ayah sa Quran a: “Hay (Nabi a) khokolob! Pamayandg ka na go ka pamakaiktiyar! Go so Kadnan ka na zlaslaang ka! Go so nditarn ka na sotiyang ka! Go so marzik na pakawataning ka!” (74:1-5). So den so kinibabaan o ayah oto na tondog tondogen so kiniibabaan o manga Ayat.

So den so kiyambaloy niyan a Nabi na inidolon niyan so Islam ko darodopa iyan. Phizaksi-an o Khadijah a da dn a tuhan a rowar ko Allah, go pzaksian iyan a so Mohammad na sogo o Allah. Si Khadijah (r.a.) so miya-ona-ona sa somiyoled ko Islam.

Sii ko soled a tlo ragon, so Nabi (Sallallahu ‘Alaihi Wasallam) na maito-maito na na ipembaba o Allah so mga ayat ko Quran: “Na payagang ka so sogoan rka, go talikhoding ka so manga pananakoto” (15:94)

Sii ko kinibabaan o giyanan a Ayah na miyaka-isa gawi-I na miyanik sekaniyan ko maito a palaw a Safa na tiyalo-an so manga Quraish (manga tao sa Makkah). Pithimo-timo iyan siran rakhes o paki-ama-an niyan a so Abu Lahab a miyakalala a pkhagowad ko Allah ago ko Sogo o Allah (Sallallahu ‘Alaihi Wasallam). Kagiya den ko matimo siran na mitharo so Nabi (Sallallahu ‘Alaihi Wasallam): “Ba niyo di katawi a o pikitokawan rekano a aya matatago sangkoto a likod palaw oto na aden a ridoway a phakawma, phangimbnar kano ron?” Somimbag siran, “Aya katotokawi ami ron na benar ko manga katharoo ka.” Na aya pitharoo iyan (s.a.w.), “Saken na sogo rekano a phaiktiyaren kano ko phamaka-oma a tiyoba.” So initaros den o Nabi (Sallallahu ‘Alaihi Wasallam) so kip-indolon niyan ko Islam. Sii ko di niyan di katharo na tominindeg sa lo-ok o manga tao si Abu Lahad na tig-iyan: “Miyoma reka so tiyoba, ba giyaya I initimo ka rekami?” Sangkoto a miyasowa-sowa na minibaba so Surah Masad: “Miyailang so dowa a tangan o Abilahab, go miyailang (skaniyan)! Dawn makanggay a gona so tamok iyan, ago so miyasokat iyan! Phakasold dn ko apoy a pzokhayaw! Go so karoma niyan a maawid sa itagon, Kiyatagoan so lig iyan sa tali a phamkl!”

Initaros den o Nabi (Sallallahu ‘Alaihi Wasallam) so kipepanolon iyan ko Islam. Initaros iyan so kabgay niyan sa toroan  o Islam ko manga tao a pkhatimo-timo taros a di sekaniyan di makazambayang sa Ka’bah. Sa giyaya masa na piyakabager o manga Quraish so kapembinasaa ko manga Muslim.

So kipendolonen o Nabi (Sallallahu ‘Alaihi Wasallam) ko lalan o Allah, kenaba langon na miyamakineg ko lango-an a toroan. Madakel a tiyarima iran so Islam na pho-on ko pamilya niyan (s.a.w.). Si Khadijah, Zayd, ago Bilal na siran so miya-ona a somiyoled ko Islam. Aden a manga tao a makapopo-on ko inged a paghadatan o manga tao sa Makkah na somiyoled sa Islam. Siran oto so Uthman bin Affan, Zubair bin Al-Awwam, Abdu Ar-Rahman bin Awf, Talha bin Ubaydillah, Sa’d bin Abi Waqqas, Arqam bin Abi Arqam, Ubaydillah bin Harith, Aa’id bin Zayd, Amr bin Nufail, Fatimah (darodopa o Nufail), Asma binti Abu Bakr, Abdullah bin Mas’ud, Ja’far bin Abi Talib ago manga ped. Da siran pen makasoled sa Islam na so Abu Bakr (r.a.) na sekaniyan so isa ko pkhababayaan o Nabi (Sallallahu ‘Alaihi Wasallam).