Safiyyah Bint Huyayya

Safiyyah Bint Huyayya

Wata sekaniyan a babay o Hayyi, a ped sekaniyan ko kiyambembaran ko harun a pagari o Musa (‘Alayhimas Salaam). Aya minimbanaya iyan na so Salam Bin Mishkam na oriyan niyan na miyapangaroma pharoman o Kananah Bin Abi Huqaiq ko kiyathidawa na miyabiyag sekaniyan (Safiyyah) o manga Muslim. So Dahya Kalbi na miyangenin sekaniyan sa oripen, na so Nabi (Sallallaho ‘Alaihi Wasallam) na inibegay niyan non sekaniyan. Sangkoto a miyaola-ola na so manga Sahabah na inimbitiyarai iran so Nabi (Sallallaho ‘Alaihi Wasallam) na miyatharo iran:

“Hay Nabi o Allah! So Banu Nazir ago so Banu Quraizah (dowa lokes a manga Yahodi sa Madinah) na mata-azir siran o mailay ran so wata a babay o isa a olowan o manga Yahodi na gi-I mapamimisaya-an. Giyoto-I sabap a ipemosawir ami a kowan-angka sekaniyan baned a karoma ngka.”

So Nabi (Sallallaho ‘Alaihi Wasallam) na bigan niyan sa mathangka a pirak so Dahya (r.a.) a iniyayon niyan non, taros a pitharo iyan ko Safiyyah:

“Imanto na miyakamaradika ka, khapakay a komasoy ka ko manga lokes ka o di makipangaroma ka raken.”

Pitharo iyan: “Mapangingindap aken a kitapi aken reka ko kababaloy aken a Yahodi. Anda manaya-I kapagawa aken reka, ko oriyan o kiyabaloy aken a Muslim?”

Masiken na aya mitotoro ini na so miyak-isa na pithataginep iyan a so saopak ko olan na miya-aben niyan. So kiyapanothola niyan non ko Kananah na tiyampiring iyan a bi-as iyan sa tanto a mabager sa minitanda ko mata niyan. Miya-aloy niyan:

“Masiken a pangingindaon ka a kapangaroma-a reka o Dato sa Madinah.”

So ama iyan na miyapanothol a lagidoto mambo a inikidiya niyan non ko kiyapanothola-on sangkoto a taginepen. Mithataginep iyan pharoman a so alongan na malolokan ko rareb iyan. So kiya-aloya niyan sii ko karoma niyan na miyatharo iyan:

“Masiken a mapangingidao ngka a kabaloy ngka a ba-I sa Madinah.”

Pitharo iyan: “Sapolo ago pito a omor aken ko kiyapangaroma-a raken o Nabi (Sallallaho ‘Alaihi Wasallam).”

Miyakathapi siran ago so Nabi (Sallallaho ‘Alaihi Wasallam) ko masa a gi-I sekaniyan mbala-balay sii ko paganay a kiyadekha-an niran pho-on ko Khaibar. Kagiya mapita, na pitharo iyan ko manga Sahabah:

“Omani isa na wita niyan sii so apiya antonai kaawidan niyan a khakan.”

Inowit iran non so awid iran a manga korma, sibo, lana go manga ped. Aden a matas a panit a miyadempas na omani isa kiran na miyontod ko melilibeta-on na piyamagato-angaran niran so pangenengken. Giyay mimbaloy a Walimah ko kapangaroma.

Miyawapat sekaniyan ko bolan a Ramadhan, ika lima-polo ko Hijrah a aya omor iyan na mararani nem-polo ragon.