Ummu Salamah Hind Bint Abi Umayya

Ummu Salamah Hind Bint Abi Umayya

Wata sekaniyan a babay o Abu Ummayyah (r.a.). Aya minimbanaya iyan na so tenged iyan a Abdullah-bin-Abdul asad a aya katawi ron na so Abu Salamah (r.a.). Siran a kharoma-ina somiyoled siran ko Islam sa pagany na tomiyogalin siran sa Habasha, sabap ko rasta o manga Quraish. Sakatao a wata a inimbawata iran sa kada iran sa inged, a bithowan niran sa Salamah. Oriyan o kiyapaka-kasoy ran pho-on sa Habasha na siran a isa ka koman na tomiyogalin siran sa Madinah. Oriyan o kiyapakasong iyan sa Madinah, na mimbawata peman sa ika dowa a bagowa mama a so ‘Umar ago dowa katao a wata a babay, so Durah ago so Zainab. So Abu Salamah (r.a.) na ika sapolo ago isa a somoled ko Islam. Miyaka-onot sekaniyan ko kiyathidawa sa Badr ago sa Uhud. Kiyapali-an sa tanto a mala sa Uhud, a daden mapiya sa miyathay. Siyogo sekaniyan o Nabi (Sallallaho ‘Alaihi Wasallam) ko isa a kathidawa ko bolan a Safar, ko ika pat ragon ko oriyan o Hijrah. Kagiya makakasoy sekaniyan pho-on sangkoto a kathidawa, na miyasekhil peman so andang a pali iyan taman sa miyawapat sekaniyan ko ika walo ko Jamadi-ul-Akhar ko ika pat ragon o Hiijrah. So Umme Salamah (r.a.) na maogat sangkoto a masa. So Zainab na inimbawata iyan ko oriyan o kiyawapat o karoma niyan. So kitatarotop o Idda, na so Abu Bakr (r.a.) na piyangakapan niyan, ogad na da sekaniyan miyog.

Da peman mathay, na so Nabi (Sallallaho ‘Alaihi Wasallam) na piyangakapan niyan. Miyatharo iyan: “Hay Nabi o Allah! Malo madakel a wata aken ago marangit ako. Ped ro-o pen na so manga lokes aken na zisi-I siran sa Makkah, na kailangan a kaodasan siran.”

So Nabi (Sallallaho ‘Alaihi Wasallam) na miyatharo iyan: “So Allah na aya den ziyap ko manga wata aka go so rarangit ka na di bo mathay na khada. Da den ko manga lokes ka o ba iran di kababaya-I so kapakapethapi ta.”

Oriyanoto na initoro iyan so wata iyan a Salamah a aya niyan wali na piyakikawing iyan so Nabi (Sallallaho ‘Alaihi Wasallam). Miyapangaroma sekaniyan ko kaposan o Shawwal ko ika pat ragon ko Hijrah.

Pitharo iyan: “Miyaneg aken so Nabi (Sallallaho ‘Alaihi Wasallam) a so tao a miyasogat a tiyoba na tharo-a niyan angkaya a pangeni: Allahumma ajirnee fee museebatee wakhlofnee khairam minha (Ya Allah! Balasia ko Ngka ko tiyoba raken go sambi-I Ngka raken sa lebi a mapiya a di sekaniyan.) Lalayon aken gi-I mindowa-a angka-I ipho-on ko kiyawapat o Abu Salamah, ka da a khapikir aken a mapiya a darodopa a lagid iyan taman sa pindiyator o Allah a kiyapangaroma-a raken o Nabi (Sallallaho ‘Alaihi Wasallam)”

So Aishah (r.a.) na pitharo iyan: “So Umme Salamah (r.a.) na lomiyangkap ko kata-id iyan. Miyaka-isa na piyanamaran aken a ka-ilaya ko rekaniyan. Miya-ilay aken sekaniyan a lebi a mata-id a di so miyatharo iyan.Aya pamikiran aken non, na kena ba sekaniyan lagid sa kata-id o gi-I tharo-on  manga tao pantag rekaniyan.”

Sekaniyan-I mori mawapat ko manga karoma o Nabi (Sallallaho ‘Alaihi Wasallam). Odi ika limapolo ago siyaw o di na ika-nem polo ago dowa ragon ko Hijrah. Walo-polo ago pat ragon a omor iyan ko kiyawapat iyan, na sabap san na inimbawata sekaniyan ko ika siyaw ko da pen so Nabuwwat.

Lagid den o kiya-aloy niyan, Nabi (Sallallaho ‘Alaihi Wasallam) na piyangaroma niyan sekaniyan ko oriyan o kiyawapat o Zainab ‘Bint Khuzayma (r.a.). Giyoto-I sabap a sii sekaniyan miyakabaling ko walay o Zainab. Miya-oma niyan roo a satiman a galingan sa tapong, go satiman a kendi, go maito a tikap a tatago-on ko koden a botha, a aya matatago sangkoto a walay. Gomyaling sekaniyan sa tikap na oriyan o kiyatago-I niyan non sa lana na initinda iyan a inipagana niyan ko Nabi (Sallallaho ‘Alaihi Wasallam) sangkoto a paganay a gawi-I a kiyapakathapi iran.