Hafsah Bint 'Umar

Hafsah Bint 'Umar

So Hafsah (Radiallaho ‘Anha) na wata a babay o ‘Umar (Radiallaho ‘Anho) go inimbawata sa Makkah ko lima ragon pen ko dapen so Nabuwwat. Aya minimbanaya iyan na so Khunais-bin-Huzaifah (r.a.), a isa ko paganay a manga Muslim. Tomiyogalin sekaniyan paganay sa Habasha na oriyan niyan na sii peman sa Madinah.Miyaka-onot sekaniyan ko kiyathidawa sa ‘Badr’ na tanto a miya-angel sa ‘Badr” (o di na sa Uhud) na aya den okit a inipatay niyan sii ko paganay o di na ika dowa ragon ko oriyan o Hijrah. So Hafsah (r.a.) na tomiyogalin pen sa Madinah a ped-o karoma niyan. So kiyapatay o karoma niyan, na so ‘Umar (r.a.) na somiyong ko Abu Bakr (r.a.) na miyatharo iyan:

“Kabaya aken a pakipangaroma ko reka so Hafsah.”

Daden tharo so Abu Bakr (r.a.). Sangkoto a masa na so Ruqayyah (r.a.) a wata a babay o Nabi (Sallallaho ‘Alaihi Wasallam) go karoma o ‘Usman (r.a.) na miyawapat pen. So ‘Umar (r.a.) na somiyong ko ‘Usman (r.a.) na inipangrao niyan non so Hafsah (r.a.). da sekaniyan miyog a gi-I niyan tharo-on “Da pen a pamikiran aken a ba ko pangaroma imanto.” So ‘Umar (r.a.) na piphanon niyan noto ko Nabi (Sallallaho ‘Alaihi Wasallam). So Nabi (Sallallaho ‘Alaihi Wasallam) na miyatharo iyab:

“Tharo-on ko reka so makaphangaroma ko Hafsah a taralebi a di ‘Usman, ago maphangaroma o ‘Usman a taralebi a di so Hafsah.”

Oriyan noto na piyangaroma niyan so Hafsah (r.a.) go inibegay niyan so wata iyan a babay a Umme Kulsum (r.a.) a mapangaroma o ‘Usman. So Abu Bakr (r.a.) na kagiya ma-thay na miyatharo iyan ko ‘Umar (r.a.):

“So kinioangoraon ka raken ko Hafsah, na da ko den tharo sabap sa miyatharo o Nabi (Sallallaho ‘Alaihi Wasallam) raken so pamikiran niyan sa kaphangaroma-a niyan non kon. Giyoto-I sabap a da ko masangka ago da ko matarima go da ko reka matharo so pagenes o Nabi (Sallallaho ‘Alaihi Wasallam). Giyoto-I sabap a da ko den tharo. Opama ka so Nabi (Sallallaho ‘Alaihi Wasallam) na siyalin niyan so pamikiran niyan na khababaya-an aken a pangaroma-an sekaniyan.”

So ‘Umar (r.a.) na pitharo iyan:

“So daden katharo o Abu Bakr (r.a.) sangkoto a kinipangoraon aken non na tanto raken a piyakalek-lek a di so kiyasangka o ‘Usman.”

So Hafsah (r.a.) na pati-is a ba-I, go tanto a mababaya Zambayang. Aya den a kalilid na gi-I sekaniyan mamowasa ko kadaon-dao go gi-I manambayang ko kagagawi-i. Miyaka-isa na so Nabi (Sallallaho ‘Alaihi Wasallam) na aden a manga sabap, na da maso-at ko Hafsah (r.a.) na pitharo iyan non so paganay a kathalaqa niya non. So ‘Umar (r.a.) na tano a piyananabad sangka-I. So Jibreel (‘Alayhis Salaam) na miyakasong ko Nabi (Sallallaho ‘Alaihi Wasallam) na miyatharo iyan:

“So Allah na kabaya Iyan a paka-kasowin ka so Hafsah, sabap ko kalilid a gi-I niyan kapamowasa ago gi-I niyan kapanambayang ko manga kagagawi-I, go so Allah na kabaya Iyan pantag bo ko ‘Umar.”

Giyoto-I sabap a so Nabi (Sallallaho ‘Alaihi Wasallam) na piyaka-kasoy niyan sekaniyan. Miyawapat sekaniyan ko Jamadil-oola ko pat-polo ago lima ragon ko oriyan o Hijrah ko nem-polo ago telo ragon a omor iyan.