Dua'aa sa Linog

DUA'AA SA LINOG

So Linog na isa den aya ko manga ala a tanda o Allah (Subhanahu Wa Ta’ala) a iptepeng Iyan ko manga oripen Niyan. So manosiya na patot a makatanod igira pkhagedam sa maito odi na mala a kaplinog aniyan katademi so Allah, lomidong Rekaniyan, ago mamangni sa tabang.

“Go sabnsabnar a siyogoan Ami so manga pagtaw ko miyaonaan ka, na piyakadansal Ami kiran so masikot, go so kapakathatalogdam, ka an siran makapangalimbabaan. Na ino siran da pangalimbabaan gowani ko makawma kiran so siksa Ami? Na ogaid na badn tomigas so manga poso iran, go pipharasan kiran o shaytan so pinggolawla iran (a manga rarata). Na kagiya a pakalipatan iran so sabap a kiyapakatadma kiran, na likaan Ami kiran so manga pinto o langowan taman, taman sa kagiya a ba siran dn miyasonor ko kiyabgi kiran, na siniksa Ami siran sa minitalmba, na samawto na siran na kiyadaan siran sa panginam!” 

[Al-An’aam 6:42-44] 

So Fuqaha (ikalimo sekaniyan o Allah) na tiyangked iyan a Mustahabb so kandu’aa, kapamangni sa rila ko Allah, megay sa sadqah igira miyakawma so linog datar o kamu-Mustahabb igira pkhailay ko kapakandowa o alongan ago so olan (eclipse).

So Ulama a Zakariya Al-Ansaari (ikalimo sekaniyan o Allah) na miyatharo iyan: “Mustahabb so kasambayang sa walay (odi na apiya anda kiyapantagi) rakhes iyan na so kalindong ko Allah, kapamangni sa rila igira aden a pkha-aden a lindog ago datar o kakila-kilat, dalendeg, taypon, mabager a ndo.” So Rasulullah (Sallallaho ‘Alaihi Wassallam) na pitharo iyan, igira mabager a ndo nam batiyaan niyan

ALLAHUMMA INNI AS-ALOKA KHAYRAHAA WA KHAYRAMAA FEEHAA WA KHAYRAMAA ORSILAT BIHEE WA A’OUDHOBIKA MIN SHARRIHAA WA SHARRIMAA FEEHAA WA SHARRIMAA ORSILAT BIHEE.

‘Ya Allah, phangening ko Reka so mapiyaon ago so mapiya ko madadalemon ago so mapiya ko siyogowanon, go pelindong ako Reka phoon ko karataiyan ago so karata o madadalemon ago so karata o shay a siyogo-anon.” [Muslim, Asna al-Mataalib Sharh Rawd al-Taalib (1/288)]

Ogaid na da ebidensya a Sunnah a aden a taralbi dhikr odi na du’a a Mustahabb so kabatiya-on igira milindog. Aya mapiya na mangni sa tabang, rila, limo ago ogop ko Allah (Subhanahu Wa Ta’ala) a pakalidasen tano Niyan ko tiyoba.

So Shaykh Ibn Baaz (ikalimo sekaniyan o Allah) na pitharo iyan: Igira pelinog, eclipse, mabager a ndo, taypon na pangni sa rila ko Allah, lindong Rekaniyan, pangni Rekaniyan sa kalilintad a ginawa ago pakalaan niyan so taden tademan niyan ko Allah a miya-aden rekaniyan datar o miyatharo o Rasulullah (Sallallaho ‘Alaihi Wassallam): “Igira phakatangimo so manga datar oto na paka-ala niyo so taden tademan niyo ko Allah ago pangni kano sa rila” [Piyagayonan]

So Rasulullah (Sallallaho ‘Alaihi Wassallam) na pitharo iyan, “Siran a masalinggagaw ko ped iyan na Ikhalimo o Allah. Siran a masalinggagaw ko ped iran sa donya, na ikhalimo siran o Allah” [At-Tirmidhi]. Ago pitharo iyan (Sallallaho ‘Alaihi Wassallam): “Siran a daden a kasalinggagaw odi na kapdi iyan ko ped iyan di ron mambo imbegay so limo ron o Allah.” [Al-Bukhari]. Miyakathitayan phoon ko ‘Umar ibn ‘Abd al-‘Azeez (r.a.) a di-i sekaniyan di zorat ko manga ped iyan a a gi-i niyanon di tharoon a begay kano sa sadqa igira kiyawmaan kano a linog [Al-Bukhari]

 “Na so miyamaratiyaya a manga mama, go so miyamaratiyaya a manga babay, na so sabaad kiran na manga panarigan o sabaad: Ipzogo iran so mapiya, go ipzapar iran so marata: Go ipthindg iran so sambayang, go pthonayn iran so zakat, go phagonotan iran so Allah go so sogo Iyan. Siran man na ikhalimo siran dn o Allah: Mataan! a so Allah na Mabagr, a Mawngangn.” [Al-Tawbah 9:71] 

 “Na mataan a thabangan dn o Allah so pthabang Rkaniyan; - mataan! a so Allah na titho a Mabagr, a Dikharn. Siran na o pakakhapaar Ami siran ko lopa, na iphamayandg iran so sambayang, go tonayn iran so zakat, go isogo iran so mapiya, go isapar iran so marata: Na kapaar o Allah so khaakiran ko pkhakawlawla.” [Al-Hajj:40-41]

“Na sa taw a ikalk iyan so Allah, na snggayan Iyan sa milidas iyan ko margn: Go mbgan Iyan sa pagpr a di niyan mapipikir. Na sa taw a somarig ko Allah, na Skaniyan dn i Maako ron. Mataan! a so Allah na pakapphamondasn Iyan so sogoan Iyan. Sabnar a tiyagoan o Allah so langowan taman sa diyangka.” [At-Talaq:2-3]