40 Hadith - (1-10)

Hadith

inisorat i: Imam An-Nawawi

initogalin sa mranao i: Monib Saranggani

PAMEKASAN

So langowan o bantogan na ruk o Allah a Kadnan o manga ka-adun, a komikibir ko manga langit agoso manga lopa, a di-i nggiragiray ko langowan o ka-adun, a somiyogo ko kalangowan o manga Sogo (asws) sangko manga taw a kiyapaliyogatan, pantag sa kattoro-a kiran ago kappayaga kiran ko manga pando-an o Agama, sa minggolalan ko manga karina a bunar ago manga tanda a marayag.

Ppodin akun Sukaniyan sabap ko manga limo Iyan, nago pagarapun akunon a puppagomanomanan Iyan so limo Iyan agoso kapdi Iyan.

Pussaksi-an akun a da a pusimba-an a bunar arowar ko Allah a Isa-isa a da a sakotowa Iyan, Isa-isa a Makagaga-os, Makapdi-in a Manapi, go pusaksi-an akun a mata-an a so pangolo tano a Muhammad (saws) na oripun Iyan ago Sogo Iyan, a pukkababaya-an Iyan ago pakatataya-an Iyan, a tindos ko manga ka-adun, a inisula-on so Qur'an a pukkababaya-an, a Mo'jizat a tatap si-i ko tunday o masa, na goso manga Sonnah niyan (HADITH Iyan) a toro-an a masindaw sangko manga taw a puloba sa toro-an, pangolo tano a Muhammad (saws), a inipunto-on so kaongangun i lalag agoso kapiya i Agama (si-i rukaniyan so rinaw agoso sanang ago si-i ko kadandan o manga Nabi (saws) agoso manga Rasol na goso manga sisipug iran agoso miyamaratiyaya a miyamagamal sa manga pipiya).

Aya orianiyan, na sabnar a miyapanottol ami a miyakapo-on ko Ali Ibn Abi Talib agoso Abdullah Ibn Mas'owd, goso Mo'az Ibn Jabal, goso Abo Darda, goso Ibn Omar, goso Ibn Abbas, goso Anas Ibn Malik, goso Abo Horaira agoso Abo Said
al-Khodri (miyaso-at kiran langon so Allah) a madakul a kiyapaka-okit iyan ago mbarambarang a kiyapanottolaon, a mata-an a so Rasulullah (saws) na pittaro iyan a: "Sa makalangag ko manga Omat akun sa pat-polo a HADITH a pud ko manga bitiyara o Agama, na oyagun o Allah sa Alongan a Qiyamah a pud ko lompokan o manga Ulama agoso manga Foqaha .”

Go si-i ko pud a kiyapanottolaon na: "Oyagun o Allah a Ulama ago Faqih.”

Go si-i ko kiyapanottolaon i Abo Darda na: "Kkabaloy ako a ppakasapa-aton ago saksi iyan sa Alongan a Qiyamah." Na si-i ko kiyapanottolaon i Ibn Mas'owd na: "Puttaro-onon a: Soldka ko manga pinto o Sorga sa sadun sa kkabaya-an kaon." Na si-i ko kiyapanottolaon i Ibn Omar na: "Kkisorat si-i ko lompokan o manga Ulama, na pagoyagun si-i ko lompokan o manga Shahid.”

Sa miyagayonayon so manga Huffaz sa giyangka-i a HADITH na malobay, apiya pun madakul so kiyapaka-okit iyan.

Sabnar a inisorat o manga Ulama (miyaso-at kiran so Allah) so dadun a itong iyan a kitab a manonompang sangka-i a bandingan.

Aya paganay a katawan akun a somiyoraton naso Abdullah Ibn al-Mubarak, orianiyan naso Ibn Aslam at-Towsi a Ulama a mala i paratiyaya, orianiyan naso al-Hasan Ibn Sofyan an-Nasa-i, goso Abubakr al-Ajowri, goso Abubakr Muhammad (saws) Ibn Ibrahim al-Ashfahani, goso ad-Darqotni, goso al-Hakim, goso Abo No'aim, goso Abo Abdul Rahman as-Solami, goso Abo Said al-Malini, goso Usman as-Saboni, goso Abdullah Ibn Muhammad (saws) al-Ansari, goso Abubakr al-Baihaqi, na goso madakul a taw a di kkaitong, a pud ko miyanga o-ona agoso miyanga o-ori.

Sa miyangni ako sa tabang ko Allah sa kiyapamili akun sa tinimo akun a pat polo a HADITH, ka ipuppananayan sangkoto a manga Imam a manga bantoga ago manga Ulama o Islam a somisiyap ko HADITH.

Go sabnar a miya-opakat so manga Ulama sa kkapakay so kakupiti ko HADITH a malobay mipantag si-i ko manga balas o manga galbuk (Fadha-il al-Amal).

Na minsampun mawto na kunaoba ayako pippasodan angkanan a HADITH, ka aya pippasodan akun naso kattaro o Rasulullah (saws) a HADITH Sahih a: "Sampayin o makamamasa rukano (so kattaro akun) ko di makamamasa.", na goso kattaro o Rasulullah (saws) a: "Ppakalangasun o Allah so bontal o taw (sa Alongan a Qiyamah) a miyanug iyan so kattaro akun na siyabot iyan, na inisampay niyan sa datar o kiyanuga niyanon."

Orianiyan na pud ko manga Ulama so tominimo sa pat polo a HADITH si-i ko manga onayan o Agama, naso saba-ad na si-i ko manga sapak o Agama, goso saba-ad na si-i ko Jihad, goso saba-ad na si-i ko Zohd, naso saba-ad na si-i ko okit a kambilangataw, naso saba-ad na si-i ko kapangosiyat, sa palayaduna-i manga pipiya a antap, pangninta a maso-at so Allah ko manga taw a giya-i i bantak iran.

Sa miyapikir akun a tomimo ako sa pat polo a HADITH a taralbi adiso kalangowananan.

Giyangka-i a pat polo a HADITH na mararangkom iyananan, sa oman i isaon a HADITH na onayan a mala a pud ko manga onayan o Agama a iniropa o manga Ulama sa ron masasamporna so Islam, odina so sabagi ko Islam, odina so ikatulo ron bagi, odina so makasasaginda san. Orianiyan na ppanamaran akun i giyangka-i a pat polo a HADITH na palayadun Sahih, goso kadakulanon na matatago ko Sahih Bukhari ago Sahih Muslim, sa aya kapagaloyako ron na da a sanad iyan, ka an malbod so kilangagunon, na makalangkap so mapunggonaon omiyog so Allah, orianiyan na ittondog akunon so pinto-an ko kappamarisi ko manga kalimah niyan.

Sa aya patot si-i ko langowan a masisingayo iyan so Alongan a mawri na makunal iyan angka-i a manga HADITH, sabap ko mararangkom iyan a manga-ala i kipantag a bandingan, na goso mapapadalumon a manga inungka si-i ko langowan a simba, sa giyanan na marayag si-i ko taw a purogorogodun iyan.

So Allah i sasarigan akun ago Ron ako zasalimbotawan, nago Ron ako ppapasod, sa ruk Iyan so podi agoso limo, a Sukaniyan i pumbugay sa Tawfiq ago siyap.

Hadith 01

Miyakapo-on ko Amir al-Mo'mineen a si Abo Hafs a Omar Ibn al-Khattab (miyaso-aton so Allah) a pittaro iyan a: Miyanug akun so Rasulullah (saws) a di-i niyan ttaroon a:

"Mata-an a ayabo a ttarima-an o Allah ko manga galbuk na sa kiyapuni-atanon sa 

soa-soat ko Allah, go mata-an a ayabo a mapumbagi-an o oman i isa ko manga galbuk iyan na sa kiyapuni-atan iyanon sa soa-soat iyan ko Allah, na sataw a aya ni-at iyan sa kiyatoglin iyan na onot iyan ko Allah agoso Sogo Iyan, na giyangkoto a kiyatogalin iyan na miyabaloy a onot iyan ko Allah agoso Sogo Iyan sa mbalasanon, na sataw a aya ni-at iyan sa kiyatogalin iyan na pantag ko donya sa kaparoliya niyanon odina pantag sa ba-i a ppangaroma-an iyan, na giyangkoto a kiyatogalin iyan na miyabaloy para sangkoto a pini-at iyan a initogalin iyan."

Piyanottol o dowa a Imam o manga Mohaddiseen a si Abo Abdullah Muhammad (saws) Ibn Ismail Ibn Ibrahim Ibn al-Mogira Ibn Bardizbah al-Bukhari, ago si Abo al-Husain Muslim Ibn al-Hadjaj Ibn Muslim al-Qushairi an-Naisabori, si-i ko Kitab iran a dowa a: Sahih Bukhari ago Sahih Muslim, a giya dowanan i tindos ko manga kitab a minisorat pantag ko HADITH.

عن أمـيـر المؤمنـين أبي حـفص عمر بن الخطاب رضي الله عنه ، قال : سمعت رسول الله صلى الله عـليه وسلم يـقـول:

( إنـما الأعـمـال بالنيات وإنـمـا لكـل امـرئ ما نـوى . فمن كـانت هجرته إلى الله ورسولـه فهجرتـه إلى الله ورسـوله ومن كانت هجرته لـدنيا يصـيبها أو امرأة ينكحها فهجرته إلى ما هاجر إليه ).

رواه إمام المحد ثين أبـو عـبـد الله محمد بن إسماعـيل بن ابراهـيـم بن المغـيره بن بـرد زبه البخاري الجعـفي، وابـو الحسـيـن مسلم بن الحجاج بن مـسلم القـشـيري الـنيسـابـوري رضي الله عنهما في صحيحيهما اللذين هما أصح الكتب المصنفه.

Hadith 02

Miyakapo-on pun ki Omar (miyaso-aton so Allah) a pittaro iyan a: Gowani a mo-ontod kami ko obay o Rasulullah (saws) si-i ko isa a alongan, na miyapayag rukami a mama a tanto a mapoti i nditarun, tanto a maitum i bok, a da a kkailay ron a rarad o kaplayalayag, go da a mata-o rukami ron a isabo, sa taman sa miyontod ko danga o Nabi (saws) na initombok iyan so dowa lub iyan ko dowa lub o Nabi (saws), go inibutad iyan so dowa palad iyan ko dowa bobon o Nabi (saws), na pittaro iyan a:

"Hay Muhammad (saws), panottolangka rakun so Islam, na pittaro o Rasulullah (saws) a: So Islam naso kassaksi-ingka sa da a pusimba-an a bunar arowar ko Allah, nago mata-an a so Muhammad (saws) na Sogo o Allah, goso kipamayandugunka ko sambayang, goso katonayangka ko Zakat, goso kappowasa-ingka ko Ramadhan, goso kapnaihadji-ika sa Baitollah, amayka kkagagangka so lalanon. Gominiraw a: Bunarka, na miyamumusa kami ron ka ippagissa iyan na pumbunarun iyan bo. Na tig iyan a: Panottolangka rakun so paratiyaya. Na pittaro iyan a: So kaparatiyaya-angka ko Allah, goso manga Malaikat Iyan, goso manga Kitab Iyan, goso manga Sogo Iyan, goso Alongan a mawri, goso kaparatiyaya-angka ko okoran, so mapiyaon agoso marataon. Gominiraw a: Bunarka, na tig iyan a: Panottolangka rakun so kappiyapiya. Na pittaro iyan a: So kasimba-angka ko Allah sa datar obangka Sukaniyan pukailay, na odingka Sukaniyan pukailay na mata-an a Sukaniyan na ppagilayingka Niyan. Gominiraw a: Panottolangka rakun so bangkit, na pittaro iyan a: Da ko inissa-anon iba ayaon mata-o adiso puppangingissa. Na gominiraw a: Panottolangka rakun so manga nana-o ron, na pittaro iyan a: So kambawata o oripun a babay sa pangolo niyan, goso kailayangka ko da a manga talompa iyan a manga talandiyang, a pukakamur-muran a di-i mamagonong sa kambing a mamagombawa siran sa kaporo i kambalay." 

Orianiyan, na miya-ipos na miyabolobolo a kagugunuk akun (a tig o Omar), orianiyan na gominiraw so Rasulullah (saws) a: "Hay Omar, ino katawanka o antawa-a so miyangingissa? Na pittaro akun a: So Allah agoso Sogo Iyan i lubi ron a mata-o. Pittaro iyan a: Mata-an a giyoto so Jibreel a miyakatalingoma rukano a ipuppangunda-o niyan rukano so Agama niyo." 

[Muslim]

عن عمر رضي الله عنه أيضا ، قال : بينما نحن جلوس عـند رسـول الله صلى الله عليه وسلم ذات يوم اذ طلع علينا رجل شديد بياض الثياب ، شديد سواد الشعر لا يرى عليه أثـر السفر ولا يعـرفه منا احـد. حتى جـلـس إلى النبي صلي الله عليه وسلم فـأسند ركبـتيه إلى ركبتـيه ووضع كفيه على فخذيه، وقـال: " يا محمد أخبرني عن الإسلام ". فقـال رسـول الله صـلى الله عـليه وسـلـم :(الإسـلام أن تـشـهـد أن لا إلـه إلا الله وأن محـمـد رسـول الله وتـقـيـم الصلاة وتـؤتي الـزكاة وتـصوم رمضان وتـحـج البيت إن اسـتـطـعت اليه سبيلا). قال : صدقت. فعجبنا له ، يسأله ويصدقه ‍‍‍‍‍‍‍‍‍‍‌‌‌؟ قال : فأخبرني عن الإيمان . قال : أن تؤمن بالله وملائكته وكتبه ورسله واليوم الاخر وتؤمن بالقدر خيره وشره قال : صدقت . قال : فأخبرني عن الإحسان . قال : ان تعبد الله كأنك تراه ، فإن لم تكن تراه فإنه يراك . قال : فأخبرني عن الساعة . قال : "ما المسؤول عنها بأعلم من السائل " قال : فأخبرني عن أماراتها . قال : " أن تلد الأم ربتها ، وان ترى الحفاة العراة العالة رعاء الشاء يتطاولون في البنيان" ثم انطلق ، فلبثت مليا ،ثم قال :" يا عمر أتدري من السائل ؟" قلت : "الله ورسوله أعلم ". قال : فإنه جبريل ، اتاكم يعلمكم دينكم "رواه مسلم

Hadith 03

Miyakapoon ki Abo Abd ar-Rahman a si Abdullah Ibn Omar Ibn al-Khattab (miyaso-at kiran a dowa so Allah) a pittaro iyan a: Miyanug akun ko Rasulullah (saws) a di-i niyan ttaro-on a:

"Piyanagombalay so Islam sa lima: So kassaksi-i sa mata-an a da a pusimba-an a bunar arowar ko Allah nago mata-an a so Muhammad (saws) na Sogo o Allah, goso kipamayandugun ko sambayang, goso kitonayin ko Zakat, goso kapnaihadji sa Baitollah, goso kappowasa-i ko Ramadhan." [Piyanottol i Bukhari ago si Muslim]

عن أبي عـبد الرحمن عبد الله بن عـمر بـن الخطاب رضي الله عـنهما ، قـال : سمعت رسول الله صلى الله عليه وسـلم يقـول :( بـني الإسـلام على خـمـس : شـهـادة أن لا إلـه إلا الله وأن محمد رسول الله ، وإقامة الصلاة ، وإيـتـاء الـزكـاة ، وحـج البيت ، وصـوم رمضان ) رواه البخاري  ومسلم

So 6 points o tabligh, giyanan na wajib rkitano a mga muslim. So 

(1) “kalima as-shahada” na aya gonsi o Islam, so 

(2) “sambayang” na pagampaganay a inipaliyogat a simba ko Allah, 

(3) “dhikr ago ilmo” na tadn tadman ko Allah ago wajib so kaphaganadi o omani muslim ko ilmo iyan, sa 

(4) mapiya kapagadata ko pagaring ka a muslim na antaway di ron kikabaya sa kabaya aka mambo a ikidiya rka o pagaring ka a muslim na langwan mapiya, apiya antonay galbuk ka a di ka maka 

(5) ”ikhlas” na dingkadun magdam sa ginawang ka so tig-iran a “sweetness of Imaan” na magdam ka oto na langwan dun a galbuk ka a mapiya na siing ka pakaantapun ko Allah na langwan a miyanggalbuk ka a marata na dingka mit-tawbat. 

So “da’wah” na obligasyon aya o omani isa ko pagari nyan kalaanon na so mga phamakalipat sa agama iran, so mga balik-islam, so di mamaganad, ago mga non-muslim. Apiya maklid a donya na wajib omani isa sa giyangkanan a 6 sifat. Ogaid na kunaba giyaya I babaloyn o Islam a rokon o Islam ago rokon a imaan.

So puman so lalayonon kapkhanuga ko 6 sifat na phanalamatun ka ko Allah a kapkhanugang ka on a tadn tadman ka ini ko kamamanosiyay rka. Datar anan oba ka pkhan sa bgas a phakambgay rka sa bagr. Giya-I mambo a repeat repeat on na iplayam ka sa ginawang ka datar o kalalayaming ka ko kakan. Ogaid na pharomanang ko, kunaba ini biyaloy a rokon o Islam.

So sii rakn pman na onotan tano so Rasulullah (saws) na dadun a lawan niyan

Hadith 04

Miyakapo-on ki Abo Abd ar-Rahman a si Abdullah Ibn Mas'owd (miyaso-aton so Allah) a pittaro iyan a: Piyanottol rukami o Rasulullah (saws) a sukaniyan so pati-is a makatotoman a: 

“Mata-an a so oman i isa rukano na pukatimo ko kappagadnaon si-i ko tiyan o ina iyan sa pat polo gawi-i na mani, orianiyan na pukabaloy a rogo a mbabattik sa datar dun oto (a pat polo gawi-i), orianiyan na pukabaloy a saporon a sapo sa datar dun oto, orianiyan na sogo-onon o Allah so Malaikat na pansiran iyan sa niyawa, nago isogo-on so pat taga a kattaro: So kisoratun ko riski niyan agoso omor iyan, goso amal iyan, na goso bagi iyan, marata i bagi antawa-a ka mapiya i bagi. Ibut ko Allah a so da a pusimba-an a bunar a salakaw Ron, ka mata-an a so isa rukano na didun di-i nggalbuk sa galbuk o taw sa Sorga, sa taman sa mabaloy a aya bo lut iyan agoso Sorga na rupung a siko, na kaona-an sukaniyan o misosorat a okoran iyan, na aya manggalbuk iyan naso galbuk o taw sa Naraka na makasoldon, go mata-an a so isa rukano na didun di-i nggalbuk sa galbuk o taw sa Naraka, sa taman sa mabaloy a aya bo a lut iyan agoso Naraka na rupung a siko, na kaona-an sukaniyan o misosorat a okoran iyan, na aya manggalbuk iyan naso galbuk o taw sa Sorga na makasoldon." [Bukhari ago si Muslim]

عن أبي عبد الرحمن عبد الله بن مسعـود رضي الله عنه ، قال : حدثنا رسول الله صلي الله عليه وسلم – وهو الصادق المصدوق - :( إن أحـدكم يجمع خلقه في بطن أمه أربعين يوما نطفه ، ثم يكون علقة مثل ذلك ، ثم يكون مـضغـة مثل ذلك ، ثم يرسل إليه الملك ، فينفخ فيه الروح ، ويـؤمر بأربع كلمات : بكتب رزقه ، واجله ، وعمله ، وشقي أم سعيد ؛ فوالله الـذي لا إلــه غـيره إن أحــدكم ليعـمل بعمل أهل الجنه حتى ما يكون بينه وبينها إلا ذراع فيسبق عليه الكتاب فيعـمل بعـمل أهــل النار فـيـدخـلها . وإن أحدكم ليعمل بعمل أهل النار حتي ما يكون بينه وبينها إلا ذراع فــيسـبـق عليه الكتاب فيعمل بعمل أهل الجنة فيدخلها ) رواه البخاري ومسلم

Hadith 05

Miyakapo-on ko Omm al-Mo'mineen a Omm Abdullah a so A'isha (miyaso-aton so Allah) a pittaro iyan a: Pittaro o Rasulullah (saws) a:

"Sataw a mbabagowan iyan angka-i a (Agama a) minitalingomami sa diron pud na di ttarima-an." Piyanottol i Bukhari ago si Muslim. 

Go aya kiyapanottolaon i Muslim na: "Sataw a nggalbuk sa galbuk a di pud ko (Agama a) minitalingomami na di ttarima-an."

عن ام المؤمنين أم عبد الله عـائـشة رضي الله عنها ، قالت : قال رسول الله صلي الله صلى الله عليه وسلم (من أحدث في أمرنا هـذا مـا لـيـس مـنه فهـو رد ). رواه الـبـخـاري ، ومسلم  وفي رواية لمسلم : ( مـن عـمـل عـمـلا لـيـس عـلـيه أمـرنا فهـو رد )

Hadith 6

Miyakapoon ki Abo Abdullah a si An-Nu'man Ibn Bashir (miyasoat kiran a dowa so Allah) a pitharo iyan a: Miyaneg aken so Rasulullah (Sallallahu Alaihi Wasallam) a dii niyan tharoon a:

”Mataan a so halal na marayag nago mataan a so haram na marayag, na (matatago) sii ko pageletan a dowa nan so manga bitiyara a di makararayag so hokoman iyan (manga Sobohat), a di makekenal o kadakelan ko manga tao, na sa tao a pananggilaan iyan so manga Sobohat na sabenar a minilidas iyan so Agama (paratiyaya) niyan agoso maratabat iyan, na sa tao a di niyan pananggilaan so manga Sobohat na mitaloga ko haram, sa datar o dii mamagonong a sii dii pamagonong ko mlilibeta ko isasapar (a pangomaan), a maito bo den a di niyanon kapakaphanathab. Tanodan, ka oman i dato na ana isasapar iyan, na aya isasapar o Allah naso manga haram. Tanodan, ka mataan a madadalem ko lawas so saporon a sapo, a igira a mithagompiya na dii thagompiya so kalangowan o lawas, na igira a miyabinasa na pekaantiyor so kalangowan o lawas. Tanodan, ka giyoto so poso." [Piyanottol i Bukhari ago si Muslim]

عن أبي عبد الله النعـمان بن بشير رضي الله عـنهما ، قـال : سمعـت رسـول الله صلي الله عـليه وسلم يقول: ( إن الحلال بين ، وإن الحـرام بين ، وبينهما أمـور مشتبهات لا يعـلمهن كثير من الناس ، فمن اتقى الشبهات فـقـد استبرأ لديـنه وعـرضه ، ومن وقع في الشبهات وقـع في الحرام ، كـالراعي يـرعى حول الحمى يوشك أن يرتع فيه،ألا وإن لكل ملك حمى ، ألا وإن حمى الله محارمه ، ألا وإن في الجـسد مضغة إذا صلحـت صلح الجسد كله ، وإذا فـسـدت فـسـد الجسـد كـلـه ، ألا وهي الـقـلب) رواه البخاري ومسلم

Hadith 7

Miyakapo-on ki Abo Roqayya a si Tamim Ibn Aws ad-Dari (miyaso-aton so Allah) a mata-an a so Nabi (saws) na pittaro iyan a: 

"So Agama na ttoma”, pittaro ami a: Antawa-a i kirukon? Na pittaro iyan a: “Ruk o Allah agoso Kitab Iyan agoso Sogo Iyan agoso manga olowan ko manga Muslim agoso kalangkap iyan kiran." Piyanottol i Muslim. 

عن أبـي رقــيـة تمـيم بن أوس الـداري رضي الله عنه ، أن النبي صلى الله عـليه وسـلم قـال :( الـديـن النصيحة ). قلنا : لمن ؟؟ قال : ( الله ، ولـكـتـابـه ، ولـرسـولـه ، ولأ ئـمـة الـمـسـلـمـيـن وعــامـتهم ) رواه مسلم

Hadith 8

Miyakapo-on ko Ibn Omar (miyaso-at kiran a dowa so Allah) a mata-an a so Rasulullah (saws) na pittaro iyan a:

"Inisogo rakun a kapakittidawa akun ko manga taw, sa taman sa kassaksi-an iran a da a pusimba-an a bunar arowar ko Allah nago mata-an a so Muhammad (saws) na Sogo o Allah, nago ipamayandug iran so sambayang, nago itonayran so Zakat, sa anday kanggolawla-a iran san na miyalinding iran rakun so manga rogo iran agoso manga tamok iran, inontabo so kabunar o Islam, sa so kappamagitonga kiran na kata-o dun o Allah." [Piyanottol i Bukhari ago si Muslim]

عن ابن عمر رضي الله عنهما ، ان رسول الله صلى الله عليه وسلـم قـال :( أمرت أن أقاتل الناس حتى يـشـهــدوا أن لا إلــه إلا الله وأن محمد رسول الله ، ويـقـيـمـوا الصلاة ، ويؤتوا الزكاة ؛ فإذا فعلوا ذلك عصموا مني دماءهم وأموالهم إلا بحق الإسلام ، وحسابهم على الله تعالى ) رواه البخاري  ومسلم

Hadith 9

Miyakapo-on ki Abo Horaira a si Abd ar-Rahman Ibn Shakhr (miyaso-aton so Allah) a pittaro iyan a: Miyanug akun so Rasulullah (saws) a di-i niyan ttaro-on a:

"So inisapar akun rukano na pananggila-i niyo, naso inisogo akun rukano na nggolalanun niyo sa sadun sa kkagaga niyo ron, ka mata-an a aya dun a miyakabinasa ko siranoto a miyaona-an iyo naso kadakul o manga paka-iza iran agoso kasosopaka iran ko manga Nabi (saws) ran."  [Piyanottol i Bukhari ago si Muslim]

عن أبي هريرة عبد الرحمن بن صخر رضي الله عنه ، قال : سمعت رسول الله صلى الله عليه وسلم يقول : ( ما نهيتكم عنه فاجتنبوه ، وما أمرتكم به فأتوا منه ما استطعتم ، فإنما أهلك الذين من قبلكم كثرة مسائلهم واختلافهم على انبيائهم ). رواه البخاري ، ومسلم

Hadith 10

Miyakapoon ki Abo Horaira (miyasoaton so Allah) a pitharo iyan a: Pitharo o Rasulullah (Sallallahu Alaihi Wasallam) a:

"Mataan a so Allah na Soti, na da a tharimaan Iyan arowar sa soti, go mataan a so Allah na inisogo Iyan ko miyamaratiyaya so datar o inisogo Iyan ko manga Rasul, sa pitharo o Allah a: "Hay sekano a manga Sogo na kangkano ko manga halal, nago nggalbek kano sa mapiya.” Go pitharo o Allah: “Hay sekano a miyamaratiyaya na kangkano ko manga halal ko inirizki Ami rekano." Orianiyan na inaloy niyan so mama a miyathay sa lakawan a mikokorab a bok iyan, a masasalampot a bayanek, a itatapnay niya so mbala a lima niyan sa langit (a dii mamangni): Hay Kadnangko, Hay Kadnangko, na aya pangnengken iyan na haram, go aya panginginomen iyan na haram, go aya nditaren iyan na haram, go piyageper a haram, na andamanaya i katharimaaon." [Piyanothol i Muslim]

عن أبي هريرة رضي الله عنه ، قال : قال رسول الله صلي الله عليه وسلم :( إن الله تعالى طيب لا يقبل إلا طيبا ، وإن الله أمر المؤمنين بما أمر به المرسلين فقال تعالى :{ يا أيها الرسل كلوا من الطيبات واعملوا صالحا } ، وقال تعالى :{ يا أيها الذين امنوا كلوا من طيبات ما رزقناكم } ، ثم ذكر الرجل يطيل السفر أشعث أغبر يمد يده إلى السماء : يا رب ! يا رب ! ومطعمه حرام ومشربه حرام وملبسه حرام وغذي بالحرام فأنى يستجاب له ؟. رواه مسلم