So Gawi-i a Jumu'ah

So Gawi-i a Jumu’ah

So gawi-i a Jumu’ah na giya-i so miyakalala a gawi-i ko Allah. Adun a a surah sa Quran a iningaran sangkaya a gawi-i a giyto so Surah Al-Jumu’ah, a dadun a lawan iyan a gawi-i. Giyaya so da lawan iyan a kapsubang o gawi-i. Sa gawi-i aya na inadun so Adam (‘Alayhis Salam), miyakasolud sekaniyan sa Sorga, ago gawi-i o kiyapakaliyo niyan ko Sorga, gawi-i a kiyawafat iyan ago gawi-i a khaadun so bangkit a dunya.

Giyangka-i a gawi-i a biyaloy o Allah gawi-i o kalilimod a piyakawajib Iyan ko manga mama so sambayang a Salatul Jumu’ah a aden a dowa a khutba. Ped ko manga galebek igira alongan a Jumu’ah a mapiya a penggalebeken o miyamaratiyaya na:

1.Sambayang a Salatul Fajr si-i ko gawi-i a Jumu’ah

عن ابن عمر قال : قال الرسول صلى الله عليه وسلم : ( أفضل الصلوات عند الله صلاة الصبح يوم الجمعة في جماعة ) . رواه البيهقي في "شعب الإيمان" . وصححه الألباني في صحيح الجامع

So sambayang a Fajr a ped ko jama’ah sii ko gawi-i a Jumu’ah na giya-i so dadun a lawan iyan a mapiya sambayang ko soled a pito gawi-i. Pitharo o Ibn ‘Umar (Radiallahu ‘Anhu): So Rasulullah (Sallallahu ‘Alayhi Wasallam) na pitharo iyan “So da lawan iyan a mapiya a sambayang na Salatul Fajr igira Jumu’ah” [Al-Albani 1119]

عن أبي هريرة رضي الله عنه أَنَّ النَّبِيَّ صَلَّى اللَّهُ عَلَيْهِ وَسَلَّمَ كَانَ يَقْرَأُ فِي الصُّبْحِ يَوْمَ الْجُمُعَةِ بِـ ( الم تَنْزِيلُ ) فِي الرَّكْعَةِ الأُولَى وَفِي الثَّانِيَةِ ( هَلْ أَتَى عَلَى الإِنْسَانِ حِينٌ مِنْ الدَّهْرِ لَمْ يَكُنْ شَيْئًا مَذْكُورًا ) .

Ped ko manga Sunnah o Rasulullah (Sallallahu ‘Alayhi Wasallam) igira Salatul Fajr na so kabatiya-a ko Surah As-Sajdah ko paganay a raka’ah ago Surah Al-Insan ko ikadowa rak’ah. Miyakathitayan ko Abu Hurairah (Radiallahu ‘Anhu) a tig iyan a so Rasulullah (Sallallahu ‘Alayhi Wasallam) na ipezakeb iyan (s.a.w.) sa Salatul Fajr ko gawi-i a Jumu’ah so Alif-Laam-Meem Tanzeel (Surah As-Sajdah) sii ko paganay a rak’ah ago Hal ata ‘alal-insaan heenun min al-dahr lam yakun shay’an madhkooran (Surah Al-Insan) sii ko ikadowa rak’ah. [Bukhari 851; Muslim 880]

قال الحافظ ابن حجر :

قِيلَ : إِنَّ الْحِكْمَة فِي هَاتَيْنِ السُّورَتَيْنِ الإِشَارَة إِلَى مَا فِيهِمَا مِنْ ذِكْر خَلْق آدَم وَأَحْوَال يَوْم الْقِيَامَة , لأَنَّ ذَلِكَ كَانَ وَسَيَقَعُ يَوْم الْجُمُعَة اهـ .

So Al-Haafiz Ibn Hajar na pitharo iyan: So kapembatiya-a ko Surah As-Sajdah ago Surah Al-Insan na sabap ko kiyaadena ko Adam (‘Alayhis Salam) ago kakhawma o bangkit a dunya a zagad ko alongan a Jumu’ah

2.Kapreparado-ay ko Salatul Jumu’ah

So kapephaigo, kakhakamotan (dii khapakay so kakhakamotan ko manga bae batabolabaw ron o mabaw o kenaba niyan mahram), kanditar a manga pipiya, kawsar sa siwak, kapotola ko bok sa irek, kapanganokowi so kemer, katagowi sa lana sa bok. Oba magaga omani isa a makasong sa Masjid komabalaga kagiya so kapangabalaga na malay balas a khakowa-on o manosiya. Thanodan a di khapakay so kandagang odi na kanggagalebekan o maneg o miyamaratiyaya so kapananalo ko sambayang datar o bang (adhan)

عن أبي هُرَيْرَةَ قال : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( إِذَا كَانَ يَوْمُ الْجُمُعَةِ كَانَ عَلَى كُلِّ بَابٍ مِنْ أَبْوَابِ الْمَسْجِدِ مَلائِكَةٌ يَكْتُبُونَ الأَوَّلَ فَالأَوَّلَ فَإِذَا جَلَسَ الإِمَامُ طَوَوْا الصُّحُفَ وَجَاءُوا يَسْتَمِعُونَ الذِّكْرَ وَمَثَلُ الْمُهَجِّرِ كَمَثَلِ الَّذِي يُهْدِي الْبَدَنَةَ ثُمَّ كَالَّذِي يُهْدِي بَقَرَةً ثُمَّ كَالَّذِي يُهْدِي الْكَبْشَ ثُمَّ كَالَّذِي يُهْدِي الدَّجَاجَةَ ثُمَّ كَالَّذِي يُهْدِي الْبَيْضَةَ ) رواه البخاري (الجمعة)

Miyakathitayan ko Abu Hurairah (Radiallahu ‘Anhu) a tig iyan: Rasulullah (Sallallahu ‘Alayhi Wasallam) na pitharo iyan “Igira miyamwa so Jumu’ah, so paytaw o Masjid na aden a Malaikat a ipzorat iran so siran oto a miyawna sa Masjid. Na aya den i kapakaontod o Imaam na pelekeban iran so libro iran na phamamakineg siran sa wasyat. So siran oto a miyawna na datar oba siran somiyombali sa onta, na siran oto a tomiyalondog na datar oba somiyombali sa sapi, so tomiyondog peman na datar o ba somiyombali sa kambing, na so peman so tomiyondog na datar oba somiyombali sa manok, na so peman so tomiyondog na orak a manok” [Bukhari, Al-Jumu’ah 1416]

3. Sunnah so kalalakaw a ipzong sa Masjid

Saden sa kadakel o inilalakaw o manosiya a pezong sa Masjid na madakel a hasanah so phakawmaon ago khada so dosa niyan.

4. Pamakineg piya-piya sa khutbah

Igira di mangutba so kathib na di khapakay so katharo, kakapet sa ator, kandingi-dingil, kapangeri-keri, so kasembaga sa salam o ped ka, kapakatarega ko salakaw a di tharo, ago so manga ped a iphakabinasa o kapamamakinegan sa khutba.

Di pun khapakay o bang ka pakaawa so miyaona ko oontodan niyan oriyan niyan pagontod kaon. Di patot a bangka pakambelaga so dowa ka taw a magobay. Igira zong sa Masjid na di ka phephakaori. Ogaid na miyaori ka a miyaraot ka so paganay ko khutba na sambayang sa dowa ka rak’ah a sunnah a Tahiyyatol Masjid.

5. Pakandakelen so salawat ko Rasulullah (Sallallahu ‘Alayhi Wasallam)

Inisogo ini o Rasulullah (Sallallahu ‘Alayhi Wasallam). Igira pkhaaloy o khatib (di-mangutbah) so Rasulullah (Sallallahu ‘Alayhi Wasallam) na salawating ka so Nabi ogaid na di phakatanogen an-di maneg o ped.

6. Pakandakelen so Dua’aa ko Allah

Sa gawi-i a Jumu’ah na aden a oras a tharimaan o Allah so dua ka.

Miyakathitayan ko Abu Hurairah (Radiallahu ‘Anhu) a pitharo o Rasulullah (Sallallahu ‘Alayhi Wasallam): “Sa alongan a Jumu’ah, aden a oras a so oripen o Allah na itendeg iyan so sambayang oriyan niyan na mangni ko Allah, daden oba aden a phangnin o oripen o Allah inonta ibegay ron o Allah" [Bukhari]

7. Kabatiya-a ko Surat Al-Kahf

Ped ko manga balas na so kabatiyaa ko Surah Al-Kahf sa gawi-i a jumu’ah a aya mbegay sa sindaw ko pageletan a dowa a Jumu’ah.

8. Sambayang a Salatul Jumu’ah

 يَا أَيُّهَا الَّذِينَ آمَنُوا إِذَا نُودِي لِلصَّلَاةِ مِن يَوْمِ الْجُمُعَةِ فَاسْعَوْا إِلَى ذِكْرِ اللَّهِ وَذَرُوا الْبَيْعَ ذَلِكُمْ خَيْرٌ لَّكُمْ إِن كُنتُمْ تَعْلَمُونَ

“Hay miyamaratiyaya, igira a inipananawag so sambayang ko alongan a Jomaat, na nggagaang kano somong ko tadm ko Allah, go awai niyo so kaphapasai: Giyoto man i mapiya rkano o skano na katawi niyo!” [al-Jumu’ah 62:9]

 عَنْ أَبِي هُرَيْرَةَ رضي الله عنه أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ : ( الصَّلاةُ الْخَمْسُ، وَالْجُمْعَةُ إِلَى الْجُمْعَةِ ، كَفَّارَةٌ لِمَا بَيْنَهُنَّ مَا لَمْ تُغْشَ الْكَبَائِرُ ) .

Miyakathitayan ko Abu Hurairah (Radiallahu ‘Anhu) a pitharo o Rasulullah (Sallallahu ‘Alayhi Wasallam): “So lima a sambayang ago pageletan a dowa Jumu’ah na pkhaponas iyan so dosa o manosiya, asar ka di sekaniyan penggalbek sa mala a dosa” [Muslim 233]

9. Mbabanogen so mga limo o Allah mapasad so Salatul Jumu’ah

  فَإِذَا قُضِيَتِ الصَّلَاةُ فَانتَشِرُوا فِي الْأَرْضِ وَابْتَغُوا مِن فَضْلِ اللَّهِ وَاذْكُرُوا اللَّهَ كَثِيراً لَّعَلَّكُمْ تُفْلِحُونَ

“Na igira a miyapasad so sambayang, na pharaparak kano ko lopa, go niyo mbabanoga so kakayaan o Allah, go tatadmi niyo so Allah sa madakl, ka ang kano makaslang sa maliwanag.” [al-Jumu’ah 62:10]

Ped ko kambabanoga ko limo o Allah na so kapaganad so ilmo, kapamisita sa manga pagari odi na ginawaying ka sa Islam, kapamisita sa aden a sakit iyan, kapanolon so agama (da’wah), katademi ko Allah, kawgopi ko ped ka Muslim.

10. Makruh (di mapiya) so kapoasa sa gawi-i bo a Jumu’ah

Ko sabaad a manga ulama a pitharo iran a haram sa kapamoasa sa gawi-i a Jumu’ah. O aden a mapipikir o sakataw a pamoasa na si-i niyan pamoasay ko alongan a onaan niyan (Khamis) odi na kaposan niyan (Sapto).

عَنْ أَبِي هُرَيْرَةَ رَضِيَ اللَّهُ عَنْهُ قَالَ : سَمِعْتُ النَّبِيَّ صَلَّى اللَّهُ عَلَيْهِ وَسَلَّمَ يَقُولُ : ( لَا يَصُومَنَّ أَحَدُكُمْ يَوْمَ الْجُمُعَةِ إِلَّا يَوْمًا قَبْلَهُ أَوْ بَعْدَهُ ) .

Miyaaloy sa Al-Bukhari (1985) ago Muslim (1144) a miyakathitayan ko Abu Hurairah (Radiallahu ‘Anhu) a tig iyan: “Miyaneg aken so Rasulullah (Sallallahu ‘Alayhi Wasallam) a pitharo iyan Di kano phamoasa ko gawi-i a Jumu’ah inonta bo pamoasa ko gawi-i a onaan niyan (Khamis) ago ko oriyan iyan (Sapto).”

11. Makruh so ka-tahajjud sii bo ko kagagawi-i o Jumu’ah

Di mapiya o pembaloyin o manosiya a da lawan niyan a gawi-i so Jumu’ah so kapanahajjud ago kapamoasa.

مسلم في صحيحه عَنْ أَبِي هُرَيْرَةَ رَضِيَ اللَّهُ عَنْهُ عَنْ النَّبِيِّ صَلَّى اللَّهُ عَلَيْهِ وَسَلَّمَ قَالَ : ( لا تَخْتَصُّوا لَيْلَةَ الْجُمُعَةِ بِقِيَامٍ مِنْ بَيْنِ اللَّيَالِي وَلَا تَخُصُّوا يَوْمَ الْجُمُعَةِ بِصِيَامٍ مِنْ بَيْنِ الْأَيَّامِ إِلا أَنْ يَكُونَ فِي صَوْمٍ يَصُومُهُ أَحَدُكُمْ ) ( الصيام/)

Pitharo o Rasulullah (Sallallahu ‘Alayhi Wasallam): “Di niyo baloyin a da lawan iyan a kagagawi-i rekano so kagagawii o Jumu’ah sa ka-tahajjud ago di kano phamoasa a baloyin niyo a da lawan iyan so kapamoasa ko alongan a Jumu’ah.” [Muslim]

Thanodan: so kagagawi-i o Jumu’ah na pagpoon aya den i kasedep o alongan sa khamis. Sa Islam na aya kapakasoled o gawi-i na aya den I kasedep o alonga, kenaba so lo-ok a kagagawi-i (12am)

13. Mapiya balita so manga miyawafat sa gawi-i a Jumu’ah

عن عبد الله بن عمرو رضي الله عنهما قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَا مِنْ مُسْلِمٍ يَمُوتُ يَوْمَ الْجُمُعَةِ أَوْ لَيْلَةَ الْجُمُعَةِ إِلا وَقَاهُ اللَّهُ فِتْنَةَ الْقَبْرِ )

Pitharo o Rasulullah (Sallallahu ‘Alayhi Wasallam): “Da Muslim a miyawafat sa gawi-i a Jumu’ah odi na sa kagagawi-i inonta pakalidasen o Allah sa fitnah o kobor”

 Kiyapoonan:

The Virtues of Friday 1 2 3

Singling out of fasting

Kalbihan o Surah Al-Ikhlas

Kalbihan o Surah Al-Ikhlas

So Quran na bolong ko mga paniyakit sa lawas, niyawa ago poso. Go omani mabatiya on o Muslim na ipepakarani niyan ko Allah go ipephakaporo o pangkatan iyan sa sorga. Go so Quran na khasapaat iyan so Muslim a sominiyap on na ped ron den so kapembatiya on, kapaganadi ron, kilangagenon, kithomanen ko sogowan iyan go kipanampaynon ko ped. Gyanan so kalangowanan ko surah sa Quran ogayd na aden pen a ped a miyaaloy o Rasulullah sallallahu alayhi wa sallam a manga kalbihan a giyangkai a surah. Ped ron:

1. عن أبي أيوب الأنصاري عن النبي صلى الله عليه وسلم قال: "أيعجز أحدكم ، أن يقرأ ثلث القرآن في ليلة ؟ فإنه من قرأ (قل هو الله أحد. الله الصمد) في ليلة فقد قرأ ليلته ثلث القرآن." صحيح الجامع

Miyakathitayan ko Abu Ayyub Al-Ansari radiyallahu anhu a pitharo o Rasulullah (Sallallahu ‘alayhi Wasallam) ko manga Sahabah niyan, "Ba di khagaga o isa rekano so kabatiyaa niyan ko telo bagi o Quran sii ko kagagawii? Sabenar a saden sa batiyaa niyan so Qul huwallahu ahad, Allahus samad, ko kagagawii na miyabatiyaya iyan so telo bagi ko Quran." [Sahihul Jami']

Samanoto na aya mitotoro iyan a giyangkai a hadith na o mabatiya ka so Suratul Ikhlas taman ko kaposan iyan na lagid ka bo o miyatamat so Quran. Masha Allah!

2. عن معاذ أنس عن النبي صلى الله عليه وسلم قال: "من قرأ (قل هو الله أحد) حتى يختمها عشر مرات بنى الله له قصراً في الجنة." السلسلة الصحيحة

Miyakathitayan ko Mu'adh ibn Anas a pitharo o Rasulullah (Sallallahu ‘Alayhi Wasallam), "Saden sa batiyaa niyan so (Qul huwallahu ahad...) taman sa mapasad iyan sa makasapolo na ipembalay o Allah sa torogan iyan sa sorga." [As-Silsilah As-Sahihah]

Samanoto na o mabatiya ka sa makadowapolong ka makasoy na ipembalay ka o Allah sa dowa a torogan ka sa sorga. Na a makatelopolo na telo mambo a torogan. Allahu akbar!

3. عن عائشة رضي الله عنها : أن النبي صلى الله عليه وسلم بعث رجلاً على سرية وكان يقرأ على أصحابه في صلاته فيختم بقل هو الله أحد، فلما رجعوا ذكروا ذلك للنبي صلى الله عليه وسلم فقال: سلوه لأي شئ يصنع ذلك؟ فسألوه فقال: لأنها صفة الرحمن وأنا أحب أن أقرأ بها. فقال النبي صلى الله عليه وسلم: أخبروه أن الله يحبه. رواه البخاري

Miyakathitayan ko Aisha (Radiyallahu Anha) a mataan a miyakaisa na so Rasulullah (Sallallahu ‘Alayhi Wasallam) na aden a siyogo iyan a sakatao a mama sii ko grupo o manga sundaro na aya niyan pembatiyaan ko manga ped iyan sii ko sambayang iyan a pepakaposan iyanon na (Qul huwallahu ahad...). Na sii ko kiyapakambalingan iran na inaloy iran oto ko Rasulullah (Sallallahu ‘Alayhi Wasallam) na pitharo iyan, "Isai niyo sekaniyan ino niyan oto pesowaa?" Na inisaan iran na tigiyan, "Sabap ko sipat oto o Ar-Rahman (So lebi a masalinggagaw) na pekababayaan aken a kapembatiyaa ko ron." Na pitharo o Nabi sallallahu alayhi wa sallam, "Tharoa niyo ron a so so Allah na pekababayaan iyan sekaniyan." [Piyanothol i Bukhari] 

4. Sii pen ko isa a hadith a miyaaloy sa Sahih Bukhari na aden a sakatao ko mga Ansar a aya waraan iyan ko kapagimam iyan na ipesakeb iyan mintin mona so Suratul Ikhlas na pembatiya peman sa salakaw a surah. Na minisampay oto ko Rasulullah (Sallallahu ‘Alayhi Wasallam) na inisaan iyan na aya inisembag iyan na sabap ko pekababayaan aken a giyangkanan a surah. Na aya pitaroon o Rasulullah (Sallallahu ‘Alayhi Wasallam) na "So babaya ka sangkanan (a Suratul Ikhlas) na miyapakasoled ka niyan ko sorga."

5. عن عائشة رضي الله عنها أن النبي صلى الله عليه وسلم كان إذا أوى إلى فراشه كل ليلة، جمع كفيه ثم نفث فيهما، فقرأ فيهما: (قل هو الله أحد) و (قل أعوذ برب الفلق)و (قل أعوذ برب الناس). ثم يمسح بهما ما استطاع من جسده، يبدأ بهما على رأسه ووجهه، وما أقبل من جسده، يفعل ذلك ثلاث مرات. رواه البخاري

Miyakathitayan ko Aisha (Radiyallahu ‘Anha) a mataan a so Rasulullah (Sallallahu ‘Alayhi Wasallam) na igira somiyong ko igaan iyan oman gawii na ptimoon iyan so dowa a lima niyan na pagiyop niyan siran, go pembatiyaan niyan so (Qul huwallahu ahad...), go so (Qul a'udhu birabbil falaq...) go so (Qul a'udhu birabbin naas...). Oriyan niyan na ipagibong iyan ko lawas iyan sa taman a khagaga niyanon, a phoonan iyan ko olo niyan go paras iyan, go ko sangoran sii ko lawas iyan (go so talikodan iyan), sa pesowaan iyan oto sa makatelo. [Piyanothol i Bukhari]

Giyangkai a surah na aya sabap a kinitoron ron na sako aden a minisa ko Rasulullah (Sallallahu ‘Alayhi Wasallam) a manga Yahud a tigiran a ropaan nka rekami so Kadnan ka? Na giyaya i inisembag kiran o Allahu ta'ala giyangkai a Suratul Ikhlas. Bithowan sa ikhlas sabap ko aya mapapadalemon na so kaisa-isa o Allah a pephangangaronganan, a dambawataan go dambawata, go daden a lagid iyan.

5. أَبِي سَعِيدٍ أَنَّ رَجُلًا سَمِعَ رَجُلًا يَقْرَأُ قُلْ هُوَ اللَّهُ أَحَدٌ يُرَدِّدُهَا فَلَمَّا أَصْبَحَ جَاءَ إِلَى رَسُولِ اللَّهِ صَلَّى اللَّهُ عَلَيْهِ وَسَلَّمَ فَذَكَرَ ذَلِكَ لَهُ ، وَكَأَنَّ الرَّجُلَ يَتَقَالُّهَا [أي يراها قليلة] فَقَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : (وَالَّذِي نَفْسِي بِيَدِهِ إِنَّهَا لَتَعْدِلُ ثُلُثَ الْقُرْآنِ) .

Miyakathitayan ko Abu Sa’eed (Radiallahu ‘Anhu) a aden a mama a miyaneg iyan a ipephangadi iyan so Qul HuwAllahu Ahad a di niyan di pakakhaso kasoyin. So kiyapita iyan na somiyong sekaniyan ko Rasulullah (Sallallahu ‘Alayhi Wasallam) and pitharo iyanon oto. Tig o mama oba oto matag baden maito ogaid a pitharo roon o Rasulullah (Sallallahu ‘Alayhi Wasallam): “So Sekaniyan a Isa-isa a Kikirek ko niyawa aken, na giyangkana na telo bagi o Quran” [Piyanothol o Bukhari 6643]

6. عَنْ أَبِي الدَّرْدَاءِ عَنْ النَّبِيِّ صَلَّى اللَّهُ عَلَيْهِ وَسَلَّمَ قَالَ : أَيَعْجِزُ أَحَدُكُمْ أَنْ يَقْرَأَ فِي لَيْلَةٍ ثُلُثَ الْقُرْآنِ ؟ قَالُوا : وَكَيْفَ يَقْرَأْ ثُلُثَ الْقُرْآنِ . قَالَ : قُلْ هُوَ اللَّهُ أَحَدٌ تَعْدِلُ ثُلُثَ الْقُرْآنِ .

Miyakathitayan ko Abu’l-Dardaa (Radiallahu ‘Anhu) a so Rasulullah (Sallallahu ‘Alayhi Wasallam) na pitharo iyan: “Baa den a sakatao rekano a di niyan magaga batiyaan so telo bagi a Quran sii ko kagagawii?” Pitharo iran: “Andamanayay kapakabatiya ami sa telo bagi o Quran?” Pitharo iyan (s.a.w.) “Qul Huwa Allaahu Ahad na aya lawan iyan na telo bagi o Quran” [Piyanothol o Muslim 811]

7.  عَنْ أَبِي هُرَيْرَةَ قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : احْشُدُوا فَإِنِّي سَأَقْرَأُ عَلَيْكُمْ ثُلُثَ الْقُرْآنِ فَحَشَدَ مَنْ حَشَدَ ، ثُمَّ خَرَجَ نَبِيُّ اللَّهِ صَلَّى اللَّهُ عَلَيْهِ وَسَلَّمَ فَقَرَأَ قُلْ هُوَ اللَّهُ أَحَدٌ ثُمَّ دَخَلَ ، فَقَالَ بَعْضُنَا لِبَعْضٍ : إِنِّي أُرَى هَذَا خَبَرٌ جَاءَهُ مِنْ السَّمَاءِ ، فَذَاكَ الَّذِي أَدْخَلَهُ ، ثُمَّ خَرَجَ نَبِيُّ اللَّهِ صَلَّى اللَّهُ عَلَيْهِ وَسَلَّمَ فَقَالَ : إِنِّي قُلْتُ لَكُمْ سَأَقْرَأُ عَلَيْكُمْ ثُلُثَ الْقُرْآنِ ، أَلَا إِنَّهَا تَعْدِلُ ثُلُثَ الْقُرْآنِ .

Miyakathitayan ko Abu Hurayrah (Radiallahu ‘Anhu) a so Rasulullah (Sallallahu ‘Alayhi Wasallam) na pitharo iyan: “Thimo-timo kano ka mbatiyaan aken rekano so telo bagi o Quran.” Naso kiyathimo-timo iran na miyaliyo kiran so Rasulullah (Sallallahu ‘Alayhi Wasallam) na biyatiya iyan kiran so Qul Huwa Allaahu Ahad na mapasad oto na somiyoled sekaniyan. Pitharo o omani isa a miyatimo a banda aden a minitoron a phoon sa langit banda ino somiyoled (sa walay). Na so Rasulullah (Sallallahu ‘Alayhi Wasallam) na lominiyo pharoman na pitharo iyan: “Miyatharo aken rekano a mbatiyaan aken rekano so telo bagi o Quran. Na mataan a giyoto a biyatiya aken rekano na giyoto ko telo bagi o Quran.” [Piyanothol i Muslim 812]

So balas na mbida-bida, datar mambo a tamok a mbida-bida lagid o pangenengken, panginginomen, nditaren, walay, pirak ago madakel pen. So manosiya a aden tamok iyan datar opama o sanggibo a dinar na kenaba kagiya aden a pirak iyan na khakowa niyan langowan a kabaya iyan a tamok. Datar opama o aden a nditaren ka ogaid na da khakan ka ago da khabalingan ka. Sa tao a batiyaan niyan so Qul Huwa Allaahu Ahad na phakakowa sekaniyan sa balas sa lawan sa ba niyan biyatiya so telo bagi o Quran ogaid na kenaba aya datar iyan a balas na so balas mambo o kiyabatiya ko titho titho a telo bagi odi na ped a surah o Qurah.

Allahu ‘Alam

phoonan: 

Kalbihan o Surah Ikhlas

Qul Huwa Allahu Ahad