Taden Tademan ko Allah (Subhanahu Wa Ta'Ala)

Taden Tademan ko Allah (Subhanahu Wa Ta'Ala)

01

So Abu Musa (Radiallaho ‘Anho) na piyanothol iyan a so Rasulullah (Sallallahu ‘Alaihi Wasallam) na pitharo iyan:

“Aya ibarat o toro-an ago so ‘Ilmo a so inosogo raken o Allah na lagid o mareges a oran a miyakatana ko lopa (a mbida-bida sa klasi) so saba-adon na masibokar a pezenepon so ig na mapephakato iyan so pamomoloan ago so manga otan a madakel. So saba-adon na kabaga-bagas a di ron zenep so ig (sa baon den matatangel) na piyakinggona-an sekaniyan o Allah ko manga manosiya ka miyamaka-inom siran non na go kiyapaka-igan niran non so (manga lopa iran) na miyakapamomolaan siran non. So peman so saba-adon na mategas a lopa a di ron zenep so ig na go di niyan maphakato so otan na lagid den oto so manga manosiya a (matetelo siran ka klasi).

1.So tao a siyabot iyan so Agama na kiyanggona-an niyan so inisogo raken o Allah na miyakasowa na go inipamangendao niyan oto.

2.So tao a di niyan khibegai so gona ko ginawa niyan ogaid na di-i kanggona-an sekaniyan o salakao ron

3. So tao a da niyan den lilingaya oto na go da niyan tarima-a so toroan o Allah a so inisogo raken”

[Bukhari]

02 

So Ibn 'Abbas (Radiallaho 'Anho) na piyanothol iyan a so Nabi (Sallallaho 'Alaihi Wasallam) na pitharo iyan: 

"PAT betad a saden sa tao a ibegay ron oto na miyakowa niyan so mapiya sa donya ago sa Akhirat:

1. Poso a masalamaten

2. Dila a lalayon a kaphagaloya niyan ko Allah (Subhanahu Wa Ta'Ala)

3. So badan a masabar ko manga tiyoba

4. Karoma a di niyan kabaya o ba niyan kandonsiyani (so karoma niyan) ko ginawa niyan odi na so tamok iyan.

[Tabarani]

03

So ‘Uthman Ibn Affan (Radiallaho ‘Anho) na piyanothol iyan a so Rasulullah (Sallallahu ‘Alaihi Wasallam) na pitharo iyan:

“Aya miyakapiya-piya rekano na so tao a piyaganad iyan so Quran na go inipangendao niyan sekaniyan.”

[Bukhari]

04

So Buraidah Al-Aslami (Radiallaho ‘Anho) na piyanothol iyan a so Rasulullah (Sallallahu ‘Alaihi Wasallam) na pitharo iyan:

“Sa tao a batiya-an niyan so Quran na go paganaden niyan (a kasabota niyanon) na inggolalan niyan noto nap aka-penditaren sa Alongan Qiyamah sa sangkad a tihaya a lagid sa sindao o alongan, go pakapenditaren so mbala-a lokes iyan sa manga salenda a di ron khiarega so donya na ipagiza iran o ino rekami pakipenditaren a lagida-a? Na mapetharo a sabap ko kiyaparoliya o wata iyo ko Quran (So kiyapaganada niyan ko Quran ago so kininggolalanen niyanon)"

[Mustadrak Hakim]

05

So Mu’awiyah (Radiallaho ‘Anho) na piyanothol iyan a so Rasulullah (Sallallahu ‘Alaihi Wasallam) na pitharo iyan:

“Sa tao a aya kabaya-on o Allah na so mapiya na phakisabotan Niyan non so Agama, aya mata-an na saken na matag ako di-imbagibagi na so Allah I pepphamegay.”

[Bukhari]

So ikadowa a katharo sii sangkaya a Hadith na aya ma-ana niyan na so Rasulullah (Sallallaho ‘Alaihi Wasallam) na miyakatalingoma sa sekaniyan na matag di-i mbagibagi ko ‘Ilmo na so Allah I pembegai sa sabot sangkaya ‘Ilmo na go pethabang sa kinggolalan niyan [Mirqat]

06

So ‘Abdullah Ibn Abbad ((Radiallaho ‘Anho) na piyanothol iyan a so Rasulullah (Sallallahu ‘Alaihi Wasallam) na giyakes ako niyan na mindowa-a:

“Ya Allah! Na pangenda-on kaon so (‘Ilmo) ko Kitab”

[Bukhari]

07

So Abu Hurairah (Radiallaho ‘Anho) na pitharo iyan:

“Miyaneg aken so Rasulullah (Sallallahu ‘Alaihi Wasallam) a di-i niyan di tharo-on ‘Sa tao a makatalingoma sangkaya Masjid aken sad a a minitalingoma niyanon rowar sa kaphaganada niyan ko mapiya odi na giya kiphangenda-on niyanon na sekaniyan na lagid o di-i njihad sa lalan o Allah. Na sa peman sa aya minitalingoma niyan na salakao ro-o na sekaniyan na lagid o mama a phagilain niyan so meri-peripet o salakao ron (a giyangkoto a matag kaphagilaya sangkoto a meriperipet a salakao ron na da-a ba niyan non mapenggona)." [Ibn Majah]

Giyangkaya a miya-aloy a hadith a kalebihan na khitakes aya ko langowan a Masjid, sabap sa so langowan a Masjid na palaya den sapak o Masjid o (Rasulullah (Sallallahu ‘Alaihi Wasallam). [Injah-ul-Haja]

08

So Ibn Mas’ud (Radiallaho ‘Anho) na pitharo iyan:

“Miyaneg aken so Rasulullah (Sallallahu ‘Alaihi Wasallam) na pitharo iyan: ‘Da a manga tao a khapakai ron so kapakasi-ig a rowar ko dowa:

1.So mama a bigan sekaniyan o Allah sa tamok na bigan sekaniyan o Allah sa kappa-ar sa kanggastowa niyan non sii ko benar,

2. So mama a bigan sekaniyan o Allah sa ‘Ilmo na inipangokom iyan oto (sa ontol) ago inipamangendao niyan oto (ko manga tao)”

[Bukhari]

Aya paka-antapan sangkaya kasi-ig na so: kasigi kenaba so titho a kasi-ig a haram so kanggola-ola-on.

09

So Abu Hurairah (Radiallaho ‘Anho) na piyanothol iyan a so Rasulullah (Sallallahu ‘Alaihi Wasallam) na pitharo iyan:

“Sa tao a pakadakelen niyan so taden-tadem ko Allah na mata-an a miyaparihala ko kamomonapiki”

[Tabarani, Jami-us-Saghir]