Agama Islam: Riya ko Simba

RIYA KO SIMBA

1. Aya mapipikir o sekaniyan a manosiya ko simba niyan na mailay sekaniyan o manga ped a tao, datar opama o tominindeg na mizambayang ka an mailay o manga tao na matharo a barasimba.

2. So simba niyan na makapag-ikhlas sekaniyan a para ko Allah, oriyaniyan na miyakaphikir sekakniyan sa kapaki-ilay-ilayin. Datar aya na kawlog sekaniyan sa dowa a phithibarangan a ola-ola an matharo a di tharimaan so simba niyan:

a.So paganay a simba niyan a makapag-ikhlas sekaniyan na tharimaan ogaid na so kiyaphikir iyan gaga-an ko kapaki-ilay-ilayin na di tharimaan. Aya datar iyan opama na aden a mama a aden a magatos a pirak iyan a imbegay niyan a sadqa. Inibegay niyan so limapolo a makapag-ikhlas sekaniyan a kiyazadka iyanon. Na kagiya den ko imbegay niyan so miyalamba a limapolo na miyapikir iyan so kapaki-ilay-ilayin na di oto tharimaan a a ped ko simba niyan.

b. So mawna a simba na mirarakhes ko oriyan o simba niyan.

i. Miyakapamikir sekaniyan sa kapaki-ilay-ilayin ogaid na piyakalipatan niyan. Miyatharo o Rasulullah (Sallallaho ‘Alaihi Wasallam): “So Allah na phrilaan Niyan so Ummah aken a aden a miyapikir iyan a marata a da niyan nggolao-laa”

ii. Miyapikir iyan so kapaki-ilay-ilayin oriyan niyan na pinggolao-ola niyan. Sakamaoto na so langon a simba niyan so kiyanggalebeka niyan a aden a kapiki-ilay-ilayinon na di tharimaan . Datar opama o mizambayang a makapag-ikhlas sekaniyan ogaid na sii ko ikadowa raka’ah na miyapikir iyan so kapaki-ilay-ilayin. So sambayang iyang ipho-on ko poonan taman sa mapasad na di tharimaan kagiya so miyawna a raka’ah na mirarakhes ko oriyan o galebek.

3. So kapaki-ilay-ilayin na miyapikir oriyan o kiyapasad den o simba. Giyaya na di khabinasa so simba niyan (datar sambayang, sadqa, zakat, puasa, hajj, ago manga pipiya amal)

Ibarat opama a so tao na miyababaya kagiya miyapasad iyan so simba niyan. Giyaya na kena oba kapaki-ilay-ilayin ka giyaya na ped ko manga to-os o imaan niyan. Miyatharo o Rasulullah (Sallallaho ‘Alaihi Wasallam): “Saden sa mababaya ko kiyanggalebek iyan ko mapiya a ‘Amaal odi na miyarata a ginawa niyan ko kiyanggalebeka niyan ko marata a ola-ola, na sekaniyan na miyaratiyaya.”