Manga Sarat O Mapiya A Sambayang

MANGA SARAT O MAPIYA A SAMBAYANG 

So manga Auliya na pitharo iran, “Aden a sapolo ago dowa nggibo a kalbihan o Sambayang, a khakowa nggolalan sangkaya a sapolo ago dowa a sarat. Opama ka so tao na kabaya iyan a makowa niyan so tarotop a balas pho-on ko Sambayang, na siyapa niyan angkaya a manga sarat. So Ikhlas na paliyogat ko omani isa si-i." Giyangkaya a manga sarat na kati-i:

     1.    ILMO: So Amaal a da-a a ilmo-on na mitatanan o Amaal a aden a tarotop a saboton. Giyoto i sabap a khakenal tano so:

                   a.    Antona-a ko manga ola-ola ko Islam i paralo ago antona-a i Sunnat.

b.    Antona-ai manga paralo ago antona-ai manga Sunnat.

c.    Anda manaya i kapekha-alangi  o Shaitan ko kapiya a gi-i kinggolalanen ko Sambayang.

     2.    ABDAS: Phanamaran tano so:

a.    Kasoti o poso tano ko si-ig ago dengki, sa lagid den o kapezotiya tano ko manga ped a anggaota o lawas.

b.    Kasotiya tano ko manga ginawa tano ko manga dosa.

c.    Kapananggila-i tano ko kapekha-ilang i odi na so tanto a kapagikot ko ig.

     3.    NDITAREN: Kailangan a:

a.    Miyasokat pho-on ko halaal a sokatan.

b.    Soti ko manga Najis

c.    Maka-ayon ko Sunnah, ibarat na di kasasapengan so panintilan

d.    Khakalilid, ago di makarinayag sa kambantogen ago kapanakabor

     4.    WAKTO: KHiyawid tano a akal so:

a.    Katendo-a ko wakto ko apiya antona-a masa

b.    Lalayon katitika-i ko Bang (Adhan)

c.    Kasiyapa ko wakto o Sambayang, ka oba tanto a mata-akir.

     5.    QIBLAH: Telo a nganin a ziyapen si-i ko kapagadap ta sa Qiblah:

a.    Ipagadap ta so paras ta sa Qiblah

b.    Ithompok ta so poso ta ko (tadem) ko Allah, sabap sa Sekaniyan i Qiblah o poso

c.    Mi-inengla ta (ko Sambayang) sa lagid o ka-i-inengka ko oripen (ko manga sogo-an non) ko kapakatitindeg iyan sa hadapan o Datu iyan.

     6.    NIYYAT: Pantag si-i na ziyapen tano angkaya telo a nganin:

a.    Khatangkeda tano o antona-a Sambayang i iphamayandeg tano

b.    Katatap o pamikiran tano sa kapakatitindeg tano sa hadapan o Allah, a phagilay reketano

c.    Katarotop o paratiyaya tano sa katawan o Allah so madadalem ko manga poso tano

     7.    TAKBIRATUL IHRAM: Aya manga rokon na:

a.    So kakoropa rekaniyan phiya-piya

b.    So kiporo-on ko mbala a lima ko pantag o manga tangila. Giyayay tanda sa piyotol tano so khampetan tano ago so langon taman, inonta bo so khampetan tano ago so Allah

c.    So kagedama tano ko Allah si-i ko manga poso tano ko masa a katharo-a tano ko Allahu Akbar

     8.    QIYAM: Si-i ko masa a Qiyam na kailangan a:

a.    Matatap so kailay tano ko darpa a sododen tano

b.    Nggedamen tano ko manga poso tano a tomitindeg tano sa hadapan o Allah

c.    Da-a mapipikir tano a salakao

     9.    QIRA’AT: Aya manga rokon na:

a.    So kabatiya-a ko Quran si-i ko ontol a Tajwid (manga takes) iyan

b.    So kapamimikirana ko ma-ana o pembatiya-an ta

c.    So kipaliyogaten ta ko ginawa ta ko pembatiya-an ta

     10. RUKU’: Aya manga rokon o Ruku’ na:

a.    So kapakathito o likod, maan so langon o lawas a kaporo-an o dowa a-i na phakatithon a kababalawag iyan

b.    So kakapet ko dowa a leb na matetekhes ago so manga kemer na makakayar

c.    So katharo-a ko Tasbih sa kapanglimbaba-an ago phipiya-piya-an

     11. SAJDAH: Aya manga rokon na:

a.    So kibetaden ko mbala a lima sa makakayat ago marani ko dowa tangila

b.    So kalelekat o mbala a siko ko dempas

c.    So katharo-a ko Tasbih sa kapanglimbaba-an ago phipiya-piya-an

     12. QA’ADAH: Aya manga rokon o Qa’dah (kaontod ko Tahayyat Akhir) na:

a.    So kaontod a o-ontodan ta so diwang a para-para ta ago makatitindeg so kawanan a para-para

b.    So kabatiya-a ko Tashahud phiya-piya a tatanodan ta so ma-ana niyan, sabap sa madadalemon so Salawat ko Rasulullah (Sallallaho ‘Alaihi Wasallam) ago so pangeni pantag ko manga pagari ta a Muslim

c.    So katangkeda ta a so Salaam a para ko manga Mala-ikat ago so manga tao si-i ko tampar sa kawanan ago so tampar sa diwang

Lagid den o kiya-aloy niyan, a so Ikhlas na aya kaphapasodan angkaya  miyanga-aloy a miyawajib rekatano so:

     1.    Kipamayandegen ko Sambayang a ayabo a Ni’at tano na tolabos a so-a-so-at ko Allah

     2.    Katangkeda sa sabap bo ko limo ago gagao o Allah a kiyapakazambayang tano

     3.    Ka-inama ko balas a ididiyandi o Allah

Reference: Fadha-il Namaz, initogalin sa basa mranao i Maulana In’amul Hassan