So Kinipaliyogaten ago Manga Balas o Samabayang

So Kinipaliyogaten ago Manga Balas o Samabayang

Tanto a madekl a manga katharo o Rasulullah (Sallallaho ‘Alaihi Wasallam) a inipaliyogat iyan so Sambayang ago miyamagosay niyan so manga balas iyan a tanto a maregen oba ma-aloy langon sangkaya a maito wasyat tano. Ogaid na sabaad baden a kha-aloy sii ko antano makakowa sa Barakah (insha Allah):

1.”So sambayang i mona-pona ago aya piyamoro-poroan a nganin a inipaliyogat o Allah, ago aya pagam-paganay ago piyamoro-poroan a phamagitongen ko Gawi-i a Kaphangokom.”

2. “Kaleken ka so Allah si-i ko Sambayang! Kaleken ka so Allah si-i ko Sambayang! Kaleken ka so Allah si-i ko Sambayang!!!”

3. “So sambayang na ayabo phageleta-an o tao ago so Shirk (Kapanakoto).”

4. “So sambayang i tanda ko Islam. So tao a ipephamayandeg iyan so Sambayang ko manga wakto niyan a Ikhlas ago phipiya-piya-an niyan, inggogolalan niyan so manga rokon taman ko “Mustahabbat” na mataan a titho a Mu’min”

5. “Si-i ko langon o inipaliyogat o Allah, na so Imaan ago so Sambayang i tanto ron a mala-i arga. Opama ka aden pen a makalawan ko Sambayang, na ipaliyogat o Allah ko manga Mala-ikat Iyan, a so sabaad kiran na romoroko na so manga ped na somodod sa dayon sa dayon.”

6. “So sambayang na polaos o Islam”

7. “So sambayang na mapephakadampanas iyan so Shaitan.”

8. “So sambayang na sindaw o Mu’min”

9. “So sambayangna maporo a Jihad.”

10. “So Allah na sisiyapen Niyan so tao ko tenday o gi-i niyan kazambayang.”

11. “Igira mintalemba so tiyoba pho-on sa langit, na so manga tao a lalayon sa Masjid na

phakalidas ko morala ago khatibaya on.”

12. “Opama ka so manga ala a dosa o Muslim na ipakanaraka iyan, na so apoy na di niyan khatotong so anggaota si-i ko lawas iyan a minisekho iyan ko lopa ko masa a somosodod igira gi-i zambayang.”

13. “So apoy na inisaparon so kasekho-a niyan ko manga anggaota o lawas a minitana ko lopa ko kasosodod iyan.”

14. “Si-i ko langon a amal, na so Sambayang a inipamayandeg ko matetendo a wakto niyan i lebi a pekhababaya-an o Allah.”

15. “So Allah na tanto Niyan a pekhababaya-an so mambebetad o tao igira a idedeket iyan so beneng iyan ko lopa ko masa a kasosodod iyan.”

16. “So tao a somosodod na lebi a marani ko Allah.”

17. “So sambayangna gonsi ko Sorga.”

18. “Igira tomitindeg so tao ko sambayang na so manga pinto o Sorga na langonon peleka-an ago so manga rending ko pageletan niyan ago so Allah na palayaden isayat (asar ka di niyan binasa-an so Sambayang iyan a kapelege-leget go manga lagid iyan.)

19. “So tao a gi-i zambayang na (lagid o ba niyan) pethotoka so pinto-an o Datu a Kadnan Iyan, ago so pinto na lalayon pheleka-an ko tao a pephanonotok.”

20. “Aya darpa o Sambayang ko Islam na lagido darpa o olo si-i ko lawas.”

21. “So sambayang i sindaw o poso. So Kabaya na pakisindawi niyan so poso iyan (mokit ko Sambayang).”

22. “So tao a khabaya a karila-an o Allah so manga dosa niyan, na pagabdas phiya-piya, zambayang phiya-piya sa dowa odi na pat raka’at a paralo odi na Sunnat a Sambayang, na oriyan niyan na pamangeni ko Allah, so Allah na perila-an Niyan sekaniyan.”

23. “Apiya anda ko lopa, a kiyatademanon so Allah ko Sambayang na pephangandag ko manga ped iyan ko lopa.”

24. “So Allah na tharima-an Niyan so pangeni o tao a phamangeni ron ko oriyan o kapazambayang iyan sa dowa raka’at a Sambayang. So Allah na imbegay Niyanon so pephani niyan, pekhasalak a sagogona odi na pekhata-alik (si-i matatago ko kakhapiya-iron ko tao).”

25. “So tao a mizambayang sa dowa raka’at ko kasisibay niyan, a daden a pephaka-ilay ron a rowar ko Allah ago so manga Mala-ikat Iyan, na phakakowa sa kapasadan a kaphakalidas iyan ko apoy ko Naraka.”

26. “So katarima o isa a pangeni (singanin) a pho-on ko Allah na miyapatot ko tao ko oriyan o omani paralo a Sambayang a mininggolalan niyan.”

27. “Miya haram ko apoy ko Naraka ago miyapatot so Sorga ko tao a magabdas phiya-oiya ago inipamayandeg iyan so Sambayang phiya-oiya, ko manga rokon niyan.”

28. “So Shaitan na ipekhalek iyan so Muslim ko tenday a kasisiyapa niyan ko Sambayang, ogaid na anda den i kindarainonen niyan non na na miyasikhem  seknaiyan o Shaitan na taros a pephanamaran niyan a kada-aga niyan non ko kapembodiyoka niyan non.” ASTAGFIRULLAH

29. “So sambayang si-i ko paganay a wakto niyan na aya taralebi a ola-ola.”

30. “So sambayang na aya pamemegayan o barasimba.”

31. “So sambayang ko paganay a wakto niyan na aya ola-ola a tanto a pekhababaya-an o Allah.”

32. “Oman Sobo, na aden a manga tao a pezong sa Masjid go aden a manga tao a pezong sa padian. So manga tao a pezong sa Masjid na aya maawid ko pandi o Islam go so manga tao a pezong sa padian na aya maawid ko pandi o Shaitan.” ASTAGFIRULLAHILLAZEEM.

33. “So pat raka’at a Sunnah ko ona-an o Dhuhr na lagid sa balas o pat raka’at a Tahajjud.” ALLAHU AKBAR

34. “So pat raka’at a Sunnah ko ona-an o Dhuhr na ini-itong sa lagid (sa balas) o pat raka’at a Tahajjud.”

35. “So limo o Allah na pethoron ko tao a tomitindeg ko Sambayang.”

36. “So sambayang ko tena-tenao a gawi-i na aya tanto a mala-i balas, ogaid na kainotan a giron nggola-ola.”

37. “So Jibrail (‘Alaihis Salam) na somiyong raken (Muhammad saw) na pitharo iyan, “Ya Muhammad (Sallallaho ‘Alaihi Wasallam), apiya-i kalendo o omor ka na aden bo a gawi-i a phatay ka, go sadden sa pekhababaya-an ka na khaganatan ka sekaniyan bo. Mata-an a khakowang ka so balas o (mapiya odi na marata a) pinggola-olang ka. Mata-an a aya daradat o Mu’min na zisi-i ko Tahajjud ago aya menang iyan na zisi-i ko kasoso-at ago kasanggila.”

38. Pitharo o Rasulullah (saw): “So dowa raka’at ko kinibolog o gawi-i na malay arga adi so langon o pathamotamokan ko donya. O di so kalek aken o ba karegeni so manga Ummat aken na baloin ko kiran a paliyogat.”

39. “Lalayon ka pithendegen so Tahajjud, sabap sa giyanan i lalan o manga tao a barasimba ago aya manga okit a iphakarani ko Allah. So Tahajjud na pekha-awat iyan so tao ko kandosa, ago pekhasabapan iyan sa kakharila-i ko manga dosa ago ipethagompiya ko kambobolawasan.”

40. Pitharo o Allah “Hay mbawata-an o Adam! Dika pepharempes ko kipethindegen ka ko pat raka’at ko paganay ko daon-dao, ka angkosan Ko reka so manga galebek ko lamba ko kadaon-dao.”

So manga kitab a Hadith na mapepeno a osayan ko manga kalbihan o Sambayang, go inipaliyogat so kinggolalanen non o manga Muslim. Giyankanan a pat-polo a Hadith a miya-aloy na khapakay a milangag ka aden makowa so balas o kilangagen ko Hadith. So kamamata-ani ron na so Sambayang a mata-an a mala a ontong, ogaid na ayabo a pephakatokao ron na so tao a kiyata-aman niyan so kamis iyan. Giyoto I sabap a so Rasulullah (Sallallaho ‘Alaihi Wasallam) na pitharo iyan a so Sambayang na aya ikapiya o pangilay-layan niyan na go aya ola-ola niyan na so kala-an ko manga kagagawii niyan na initindeg iyan (so Sambayang) sa hadapan o Allah.

Giya-i den i sabap a so Rasulullah (Sallallaho ‘Alaihi Wasallam) si-i pen ko iga-an a phatayan niyan na inipi-is ago inipaliyogat iyan rekatano so kitomanen tano ko Sambayang. Miyapanothol ko madakel a Hadith a so Rasulullah (Sallallaho ‘Alaihi Wasallam) na lalayon so gi-i niyan katharo a, “Kaleken niyo so Allah pantag ko Sambayang.”. So Abdullah Ibn Mas’od (r.a.) na miyapanothol iyan a miyaneg iyan so Rasulullah (Sallallaho ‘Alaihi Wasallam) a gi-i niyan tharo-on “Si-i ko langon o manga ‘amal, na so Sambayang i tanto raken a mala-i arga.”

Reference: Fadha-il Namaz